माणदेश एक्सप्रेस न्युज | कुपवाड –
मिरज तालुक्यातील सावळी गावात रविवारी संध्याकाळी घडलेल्या भीषण अपघातात संतू भीमा भोरे (वय ७०, रा. कानडवाडी, ता. मिरज) या वृद्धाचा मृत्यू झाला. गाव तलावासमोरील रस्त्यावरून पायी चालत जात असताना पाठीमागून वेगाने आलेल्या क्रेनने त्यांना जोराची धडक दिली. अपघात इतका गंभीर होता की क्रेनचे चाक अंगावरून गेल्याने भोरे यांना गंभीर दुखापत झाली. तात्काळ उपचारासाठी त्यांना मिरजेतील शासकीय रुग्णालयात दाखल करण्यात आले, मात्र उपचारादरम्यान त्यांचा मृत्यू झाला.
फिर्यादी प्रवीण भोरे यांच्या माहितीनुसार, संतू भोरे हे रविवारी कुपवाड येथे त्यांच्या मित्राला भेटायला गेले होते. भेट झाल्यानंतर ते सावळीमार्गे कानडवाडीला पायी जात होते. त्यावेळी सायंकाळच्या सुमारास सावळी गावातील तलावासमोरील रस्त्यावर क्रेन (क्र. एमएच १० सीएन ८७९) ने मागून येत त्यांच्या अंगावर जोरदार धडक दिली.
या अपघातानंतर कुपवाड पोलिस ठाण्यात गुन्हा दाखल करण्यात आला आहे. पोलिसांनी क्रेन चालक संतोष गोरख बाबर (वय २५, सध्या रा. दत्तनगर, बामणोली, मूळ गाव सांगोला) याला तात्काळ अटक केली. अपघाताबाबत पुढील तपास सुरू असल्याची माहिती पोलीस निरीक्षकांनी दिली.
या घटनेमुळे सावळी व कानडवाडी परिसरात शोककळा पसरली आहे. निरपराध वृद्धाचा जीव बेदरकार वाहनचालकामुळे गमवावा लागल्याने नागरिकांमध्ये संताप व्यक्त होत आहे. अपघातग्रस्त ठिकाणी वाहतुकीसंदर्भात आवश्यक खबरदारी व कठोर कारवाई करण्याची मागणी स्थानिकांकडून केली जात आहे.
👉 अपघातग्रस्त संतू भोरे यांच्या निधनामुळे कुटुंबीयांवर शोककळा पसरली असून पोलिस तपासानंतर या प्रकरणाचा पुढील तपास न्यायालयीन स्तरावर होणार आहे.
