माणदेश एक्सप्रेस न्यूज | नाशिक
नाशिक शहरातून एक हृदयद्रावक घटना समोर आली आहे. इयत्ता सहावीमध्ये शिकणाऱ्या एका ११ वर्षांच्या मुलीचा शाळेत जात असताना हृदयविकाराच्या झटक्याने मृत्यू झाला. ही दुर्दैवी घटना नाशिकमधील एका इंग्रजी माध्यमाच्या शाळेत घडली असून मृत विद्यार्थिनीचे नाव श्रेया किरण कापडी (वय ११) असे आहे.
मिळालेल्या माहितीनुसार, श्रेया नेहमीप्रमाणे शाळेत जात होती. शाळेच्या गेटमध्ये प्रवेश करत असताना तिला अचानक चक्कर आली आणि ती बेशुद्ध पडली. शिक्षिका आणि शाळेतील कर्मचाऱ्यांनी तातडीने तिला जवळच्या खाजगी रुग्णालयात दाखल केले. मात्र, उपचार सुरू करण्याआधीच डॉक्टरांनी तिला मृत घोषित केले.
प्राथमिक तपासणीनंतर डॉक्टरांनी हृदयविकाराचा झटका मृत्यूचे कारण असल्याची शक्यता व्यक्त केली आहे. तिच्या कुटुंबीयांनी दिलेल्या माहितीनुसार, श्रेयाला पूर्वीपासूनच हृदयाशी संबंधित सौम्य त्रास होता. मात्र, अशा प्रकारचा गंभीर झटका अचानक येईल, याची कुणालाही कल्पना नव्हती.
लहान वयात वाढणारा हृदयविकाराचा धोका!
ही घटना केवळ एक अपवाद नाही. अलीकडच्या काळात लहान वयातील मुलांमध्येही हृदयविकाराचे प्रमाण झपाट्याने वाढत असल्याचे वैद्यकीय अहवाल दर्शवतात. जीममध्ये, मैदानी खेळ खेळताना किंवा शाळेत असताना लहानग्यांनाही हृदयविकाराचे झटके येत असल्याच्या अनेक घटना समोर आल्या आहेत.
हृदयविकार म्हणजे फक्त छातीत दुखणं नव्हे
छातीत दुखणं म्हणजे हार्ट अटॅक असे समजणे अर्धवट माहितीचे लक्षण आहे. गॅस, अपचन, किंवा अन्य कारणांनीही छातीत वेदना होऊ शकतात. मात्र, हृदयविकाराचे सूचक संकेत ओळखणे आणि वेळेत वैद्यकीय सल्ला घेणे अत्यंत आवश्यक आहे.
आरोग्य जागरूकतेची गरज
शाळकरी वयात घडलेल्या अशा दुर्दैवी घटनांमुळे पालकांनी आपल्या मुलांच्या आरोग्याबाबत अधिक सजग होण्याची गरज आहे. संतुलित आहार, वेळच्या वेळी आरोग्य तपासणी आणि तणावमुक्त जीवनशैली हे घटक आजच्या काळात अत्यावश्यक ठरत आहेत.
श्रेया कापडीच्या अचानक निधनामुळे परिसरात शोककळा पसरली असून शाळेतील शिक्षक, वर्गमित्र आणि स्थानिक नागरिकांनी तीव्र दुःख व्यक्त केले आहे.
