माणदेश एक्स्प्रेस न्यूज | नवी दिल्ली :
केंद्रीय माध्यमिक शिक्षण मंडळाने (सीबीएसई) दहावी आणि बारावीच्या बोर्ड परीक्षा पद्धतीत मोठा बदल केला आहे. आता विद्यार्थ्यांना बोर्ड परीक्षेला बसण्यासाठी संबंधित विषय सलग दोन वर्षे शिकणे अनिवार्य राहणार आहे. या निर्णयामुळे नववी- दहावी आणि अकरावी- बारावीचा अभ्यासक्रम अधिक बांधेसूद व एकसंध होणार आहे.
नव्या नियमांनुसार, विद्यार्थ्यांनी नववीत निवडलेले विषय दहावीतही शिकणे आवश्यक आहे. म्हणजेच, जर एखाद्या विद्यार्थ्याने ‘फॅशन डिझाइनिंग’, ‘पेंटिंग’ किंवा इतर पर्यायी विषय निवडले असतील, तर दहावीत हे विषय बदलणे शक्य होणार नाही. हाच नियम अकरावी-बारावीच्या विद्यार्थ्यांसाठीही लागू राहणार आहे. त्यामुळे विषय निवडताना विद्यार्थ्यांनी व पालकांनी अधिक सजग राहावे लागेल.
सीबीएसईचे परीक्षा नियंत्रक डॉ. संयम भारद्वाज यांनी स्पष्ट केले की, हे बदल राष्ट्रीय शैक्षणिक धोरण २०२० च्या मार्गदर्शक तत्वांनुसार करण्यात आले आहेत. शिक्षण पद्धती अधिक पारदर्शक, सातत्यपूर्ण आणि प्रभावी करण्याचा यामागचा हेतू आहे.
बोर्डाने नव्या नियमांबरोबरच विद्यार्थ्यांसाठी काही अटी लागू केल्या आहेत.
बोर्ड परीक्षेला बसण्यासाठी किमान ७५ टक्के उपस्थिती बंधनकारक असेल.
प्रत्येक विषयाचे अंतर्गत मूल्यमापन अनिवार्य असेल.
शाळेत गैरहजर राहिलेल्या विद्यार्थ्यांचे मूल्यमापन होणार नाही आणि त्यांचा निकालही घोषित केला जाणार नाही.
यामुळे विद्यार्थ्यांना नियमित शाळेत उपस्थित राहणे आणि अंतर्गत चाचण्यांना गांभीर्याने सामोरे जाणे आवश्यक ठरणार आहे.
सीबीएसईने सर्व शाळांना स्पष्ट सूचना दिल्या आहेत की, बोर्डाची परवानगी घेतल्याशिवाय कोणताही नवीन विषय सुरू करू नये. विद्यार्थ्यांच्या भविष्याशी संबंधित कोणताही निर्णय घेताना शाळांनी अधिक काळजी घ्यावी, असा इशाराही मंडळाने दिला आहे.
या निर्णयामुळे आता विद्यार्थ्यांना नववी आणि अकरावीमध्ये विषय निवडताना अधिक दूरदृष्टीने विचार करावा लागणार आहे, कारण एकदा निवडलेले विषय पुढील दोन वर्षांसाठी कायम राहतील. पालकांनीही मुलांच्या आवडी, क्षमता आणि करिअरच्या दृष्टीने योग्य विषय निवडण्यास मदत करणे महत्त्वाचे ठरणार आहे.
👉 सीबीएसईचा हा निर्णय शिक्षण पद्धतीत शिस्त, सातत्य आणि गंभीरता आणणारा ठरणार असून, विद्यार्थ्यांसाठी हा बदल महत्त्वाचा टप्पा ठरणार आहे.
