माणदेश एक्सप्रेस न्यूज|ठाणे : राज्यातील सत्ताधारी भाजपासाठी ठाणे जिल्ह्यातून धक्कादायक बातमी समोर आली आहे. मुरबाड नगरपंचायतीतील भाजपाचे १० पैकी ९ नगरसेवक एकत्र येत ‘मुरबाड परिवर्तन पॅनल’ नावाने स्वतंत्र गट स्थापन करून भाजपाच्या अधिकृत गटापासून वेगळे झाले आहेत. यामुळे मुख्यमंत्री देवेंद्र फडणवीस आणि स्थानिक आमदार किसन कथोरे यांना मोठा धक्का बसला आहे. या नव्याने तयार झालेल्या गटाला जिल्हाधिकारी कार्यालयाकडून अधिकृत मान्यताही मिळालेली आहे.
भाजपाचे वर्चस्व संपुष्टात
२०१८ मध्ये झालेल्या मुरबाड नगरपंचायत निवडणुकीत १७ पैकी १० जागांवर भाजपाचे नगरसेवक निवडून आले होते. शिवसेना ५ आणि २ अपक्ष नगरसेवक भाजपाच्या समर्थनार्थ उभे राहिल्याने नगराध्यक्ष व उपनगराध्यक्षपदही भाजपाच्या ताब्यात गेले होते. मात्र, अलीकडील काळात उपनगराध्यक्ष पदाच्या निवडणुकीवरून पक्षांतर्गत मतभेद उफाळून आले.
अपक्ष उमेदवाराला पाठिंबा
उपनगराध्यक्ष पदासाठी आमदार कथोरे यांनी शिवसेनेच्या नगरसेवकाचे नाव सुचवले होते, मात्र भाजपाच्या नगरसेवकांनी याला तीव्र विरोध दर्शवला. त्यानंतर झालेल्या निवडणुकीत भाजपाच्या नगरसेवकांनी पक्षाच्या उमेदवाराला डावलून अपक्ष उमेदवाराला पाठिंबा दिला आणि तो विजयी झाला.
‘मुरबाड परिवर्तन पॅनल’ची स्थापना
२६ मे रोजी नगरसेवक मोहन गडगे यांच्या नेतृत्वाखाली ९ नगरसेवकांनी स्वतंत्र गट स्थापन करण्यासाठी जिल्हाधिकाऱ्यांकडे अर्ज केला होता. याला अधिकृत मान्यता मिळाल्याने आता नगरपंचायतीत भाजपाच्या गटात केवळ १ नगरसेवक उरला आहे, तर उर्वरित ९जण नव्या गटात सामील झाले आहेत. भाजपाच्या समर्थनार्थ असलेले २ अपक्षही आता अनिश्चिततेच्या भूमिकेत आहेत.
भाजपाकडून समेटाचा प्रयत्न
भाजप ठाणे ग्रामीण जिल्हाध्यक्ष जितेंद्र डाकी यांनी या प्रकाराची पुष्टी दिली असून सांगितले की, “नगरसेवकांमध्ये उपनगराध्यक्षपदावरून नाराजी होती. आम्ही नाराज नगरसेवकांच्या संपर्कात आहोत. लवकरच प्रदेशाध्यक्षांच्या उपस्थितीत बैठक घेण्यात येणार असून, तक्रारी सोडवण्याचा प्रयत्न केला जाईल.”
राजकीय भूकंपाची चाहूल?
मुरबाडमधील ही राजकीय उलथापालथ भाजपासाठी केवळ स्थानिक नाही, तर रणनीतिक पातळीवरही गंभीर चिंता निर्माण करणारी ठरू शकते. विधानसभेच्या दृष्टीने महत्त्वाच्या असलेल्या मुरबाड मतदारसंघात पक्षातील असंतोषाचा हा स्फोट भविष्यात मोठ्या राजकीय घडामोडींना तोंड फोडू शकतो.
