माणदेश एक्सप्रेस न्यूज|मुंबई : राज्यातील शाळांमध्ये हिंदी भाषा सक्तीचा जीआर रद्द करण्यास भाग पाडल्यानंतर शिवसेना (ठाकरे गट) आणि महाराष्ट्र नवनिर्माण सेनेने (मनसे) मुंबईत भव्य विजयी मेळाव्याचं आयोजन केलं. तब्बल वीस वर्षांनंतर उद्धव ठाकरे आणि राज ठाकरे एका मंचावर एकत्र आल्याने राजकीय वर्तुळात खळबळ उडाली आहे. परंतु याच पार्श्वभूमीवर भारतीय जनता पक्षाने उद्धव ठाकरे यांचं मराठीप्रेम ढोंगी असल्याचा आरोप करत सडकून टीका केली आहे.
भाजपाचे मुख्य प्रवक्ते केशव उपाध्ये यांनी सोशल मीडिया प्लॅटफॉर्म एक्स (Twitter) वर एक सविस्तर पोस्ट करत उद्धव ठाकरे यांच्यावर आणि त्यांच्या सरकाराच्या निर्णयांवर ताशेरे ओढले. त्यांनी लिहिलं की,
“उद्धव ठाकरेंनी मराठी सक्तीचा जीआर रद्द केला आणि आज त्याचाच निषेध करणारा मेळावा भरवला. मराठी सक्ती सांगणाऱ्या जीआरची होळी करणारे आज मराठीच्या नावाने हंबरडा फोडत आहेत. हे त्यांचं मराठीप्रेम की ‘पुतना मावशीचं प्रेम’?”
भाजपाची टीकेची मुख्य मुद्दे:
जीआरचा विरोध आणि मेळाव्याचं दांभिकत्व
उपाध्ये म्हणाले की, उद्धव ठाकरेंनी मुख्यमंत्रीपदाच्या काळात मराठी सक्तीचा जीआरच रद्द केला होता. त्यानंतर आता हिंदी विरोधाच्या नावाखाली मराठीचा मुद्दा उचलणे म्हणजे निव्वळ राजकीय ढोंग आहे.मुंबई महापालिकेतील मराठी शाळांची दुर्दशा
उपाध्ये यांनी आकडेवारी देत सांगितलं की, “शिवसेनेचं मुंबई महापालिकेवर दीर्घकाळ वर्चस्व असतानाही मराठी शाळांची संख्या ४०० वरून २८० वर आली. विद्यार्थ्यांची संख्या लाखांहून कमी होऊन ३५ हजारांवर आली आहे. काही शाळा बंद होण्याच्या मार्गावर आहेत. यातून उद्धव ठाकरेंचं खोटं मराठीप्रेम दिसून येतं.”उर्दू भवनाची घोषणा आणि मराठीचा विसर
“मुख्यमंत्री असताना उद्धव ठाकरेंनी उर्दू भवनाची घोषणा केली, पण मराठी शाळांसाठी कोणतीही ठोस पावलं उचलली नाहीत. हेच त्यांचं प्राधान्य दर्शवतं,” असा आरोप उपाध्ये यांनी केला.राष्ट्रवादी काँग्रेसवरही टीका
केवळ ठाकरे नव्हे, तर राष्ट्रवादी काँग्रेस (शरद पवार गट) यांच्यावरही उपाध्ये यांनी निशाणा साधला. त्यांनी लिहिलं की, “२०२० मध्ये राष्ट्रवादीने ‘हिंदी भाषा जोडो’ अभियान राबवलं. त्याचं उद्घाटन जयंत पाटील यांनी केलं होतं. आणि आज तेच हिंदी विरोधात मोर्चा काढत आहेत. ही लोकांची फसवणूक नाही का?”
राजकीय पार्श्वभूमी आणि भविष्यातील परिणाम
मुंबईत झालेल्या या ऐतिहासिक मेळाव्यात ठाकरे गट आणि मनसे एकत्र येत असल्याने राज्यातील राजकारणात मोठा बदल होण्याची चिन्हं आहेत. मराठी अस्मिता, हिंदी सक्ती, आणि शिक्षण निती यासारख्या मुद्द्यांवरून भाजप आणि इतर पक्षांमध्ये संघर्ष वाढण्याची शक्यता आहे.
उपाध्ये यांच्या या टीकेमुळे राजकीय वातावरण अधिक तापण्याची चिन्हं दिसत आहेत. आता ठाकरे गट किंवा मनसे याकडे काय उत्तर देतात, याकडे संपूर्ण राज्याचं लक्ष लागलेलं आहे.
