माणदेश एक्सप्रेस न्यूज : पुणे
महाराष्ट्राची सांस्कृतिक राजधानी म्हणून ओळखल्या जाणाऱ्या पुण्यात गणेशोत्सव मोठ्या उत्साहात साजरा होत आहे. दरवर्षीप्रमाणे यंदाही गणपती बाप्पाच्या आगमनानंतर शहरात उत्साह, जल्लोष आणि भक्तिभाव ओसंडून वाहताना दिसत आहे. मात्र या गर्दीच्या उत्सवात नागरिकांची सुरक्षितता, सोय व सार्वजनिक शांतता राखणे हे प्रशासनासमोरचे मोठे आव्हान असते. यासाठी पुणे प्रशासनाने काही महत्त्वाचे निर्णय घेतले असून, यामध्ये वाहतूक बदल, पार्किंगची विशेष व्यवस्था, ध्वनीप्रदूषणावरील नियंत्रण आणि मद्यविक्रीवर बंदी यांचा समावेश आहे.
यंदाच्या गणेशोत्सवात पुणेकर मोठ्या प्रमाणात मेट्रो सेवेचा वापर करत आहेत. केवळ ३० ऑगस्ट रोजी ३ लाख ६८ हजार ५१६ प्रवाशांनी मेट्रोचा वापर केला. हे नेहमीपेक्षा तब्बल एक लाखांनी जास्त असून, या वाढीमुळे मेट्रोच्या उत्पन्नात १३ लाख रुपयांची भर पडली आहे. नागरिकांची सोय लक्षात घेऊन गणेशोत्सवादरम्यान पुणे मेट्रोची सेवा रात्री २ वाजेपर्यंत वाढविण्यात आली आहे.
गणपती विसर्जन मिरवणुकीच्या दिवशी पुण्यात वाहतूक कोंडी मोठ्या प्रमाणावर होते. ही समस्या टाळण्यासाठी वाहतूक शाखेने २७ ठिकाणी पार्किंगची व्यवस्था केली आहे. यामध्ये दुचाकी आणि चारचाकींसाठी स्वतंत्र जागा निश्चित करण्यात आल्या आहेत.
🔹 दुचाकी पार्किंगची ठिकाणे
न्यू इंग्लिश स्कूल (रमणबाग), शिवाजी आखाडा वाहनतळ, देसाई कॉलेज पोलिस पार्किंग, विमलाबाई गरवारे हायस्कूल, गोगटे प्रशाला, आपटे प्रशाला, मराठवाडा कॉलेज, पेशवा पथ, रानडे पथ, पेशवे पार्क सारसबाग, हरजीवन रुग्णालयासमोर सावरकर चौक, काँग्रेस भवन रस्ता, पाटील प्लाझा पार्किंग, पर्वती–दांडेकर पूल, दांडेकर पूल–गणेशमळा, गणेशमळा–राजाराम पूल इत्यादी.
🔹 चारचाकी पार्किंगची ठिकाणे
निलायम टॉकीज, हमालवाडा (पत्र्यामारुती चौकाजवळ), आबासाहेब गरवारे कॉलेज, संजीवनी मेडिकल कॉलेज मैदान, फर्ग्युसन कॉलेज, एसएसपीएमएस शिवाजीनगर, जैन हॉस्टेल बीएमसीसी रस्ता, एसपी कॉलेज, पीएमपीएमएल मैदान (पुरम चौकाजवळ), न्यू इंग्लिश स्कूल (टिळक रस्ता), नदी पात्र (भिडे–गाडीतळ पूल) इत्यादी.
ध्वनी प्रदूषण (नियमन व नियंत्रण) नियम २००० अंतर्गत गणेशोत्सव काळात ध्वनिक्षेपक व ध्वनीवर्धक वापरासाठी दिलेल्या शिथिलीकरणाच्या आदेशात दुरुस्ती करण्यात आली आहे.
याआधी १ सप्टेंबर २०२५ (सहावा दिवस) या दिवशी सूट दिली होती.
मात्र आता तो बदल करून ५ सप्टेंबर २०२५ (दहावा दिवस) असा करण्यात आला आहे.
हा दुरुस्त आदेश पुणे जिल्हाधिकारी यांनी जारी केला असून, विसर्जन मिरवणुकीत होणाऱ्या कार्यक्रमांसाठी हे बदल महत्त्वाचे ठरणार आहेत.
गौरी विसर्जन (२ सप्टेंबर) आणि अनंत चतुर्दशी (६ सप्टेंबर) या दोन दिवशी मद्यविक्री पूर्णपणे बंद ठेवण्याचा निर्णय जिल्हाधिकाऱ्यांनी घेतला आहे. महाराष्ट्र दारूबंदी कायद्यांतर्गत हा आदेश देण्यात आला असून, सार्वजनिक शांतता आणि कायदा सुव्यवस्था राखणे हा त्यामागील उद्देश आहे.
तसेच विसर्जन मिरवणूक संपेपर्यंत दुकाने व आस्थापने बंद ठेवण्याचे आदेशही दिले आहेत.
