माणदेश एक्सप्रेस न्यूज – आटपाडी / प्रतिनिधी : आटपाडी तालुक्यातील भिंगेवाडी येथील शेकडो नागरिक, ग्रामपंचायत सदस्य, विविध संस्थांचे संचालक, माजी पदाधिकारी यांनी एकत्रितपणे शिवसेना (शिंदे गट) मध्ये जाहीर प्रवेश करून तालुक्यातील राजकीय वर्तुळात मोठी खळबळ उडवली आहे. या प्रवेशामुळे शिवसेना शिंदे गटाला तळागाळात नवे बळ मिळाले असून आगामी राजकीय समीकरणांवर या घटनेचा मोठा प्रभाव पडणार असल्याचे संकेत राजकीय तज्ज्ञांकडून व्यक्त केले जात आहेत.
या मोठ्या प्रवेश सोहळ्यात गटप्रमुख सोमेश्वर नंदकुमार भिंगे, भिंगेवाडी विकास सोसायटीचे माजी चेअरमन मधुकर पवार, अरुण पवार, दिलीप आलदर, सोसायटीचे संचालक खाशेराव सुतार, किसन सूर्यवंशी, सुधाकर जाधव, उदय खडसरे, समाधान घोंगडे, सतीश खंडसरे, महेश भिंगे, संजय जाधव, शैलेश भिंगे यांच्यासह अनेक कार्यकर्ते व समर्थकांनी शिवसेना (शिंदे गट) निवडला. ग्रामपंचायतीचे सर्व सदस्य, तसेच विविध संस्थांचे संचालक व माजी संचालक यांचा सहभाग विशेष ठरला.
या प्रवेश सोहळ्याची प्रमुख प्रेरणा सांगली जिल्हा बँकेचे संचालक मा. तानाजीराव पाटील (अध्यक्ष) यांचे मार्गदर्शन आणि आमदार मा. सुहासभैया बाबर यांच्या विकासाभिमुख कामकाजावर असलेला ठाम विश्वास असल्याचे कार्यकर्त्यांनी स्पष्ट केले. “भाऊंच्या आशीर्वादाने आणि अध्यक्षांच्या सक्षम नेतृत्वामुळे आटपाडी शहर व तालुक्याचा सर्वांगीण विकास आणखी वेगाने होणार,” असा विश्वास कार्यकर्त्यांनी व्यक्त केला.
आमदार सुहासभैया बाबर यांनी गेल्या काही वर्षांत रस्ते, पाणीपुरवठा, शिक्षण, आरोग्य सुविधा आणि ग्रामीण पायाभूत विकासासाठी घेतलेल्या पुढाकारांमुळे नागरिकांमध्ये विश्वासाचे वातावरण निर्माण झाले आहे. त्याचा परिणाम म्हणून भिंगेवाडीतील मोठ्या प्रमाणात लोकांनी शिवसेना शिंदे गटावर विश्वास व्यक्त केल्याचे स्पष्ट दिसून आले.
प्रवेश सोहळ्यावेळी सामाजिक, शैक्षणिक आणि राजकीय क्षेत्रातील अनेक मान्यवर मोठ्या संख्येने उपस्थित होते. उपस्थित मान्यवरांनी नवीन सदस्यांचे स्वागत करत, “या मोठ्या प्रवेशामुळे पक्ष संघटनेला नवचैतन्य मिळेल आणि आगामी स्थानिक निवडणुकांत शिवसेना शिंदे गट अधिक सक्षमपणे उभा राहील,” असा विश्वास व्यक्त केला.
भिंगेवाडीतील हा प्रवेश सोहळा केवळ पक्षबळ वाढवणारा नाही तर आटपाडी तालुक्यातील राजकीय वातावरणात नव्या घडामोडींना सुरुवात करणारा ठरला आहे. शिवसेनेच्या तळागाळातील संघटनशक्तीला मिळालेल्या या बळकटीमुळे येणाऱ्या काळात राजकीय समीकरणांमध्ये मोठे बदल घडतील, असे संकेत या घटनाक्रमातून मिळत आहेत.
