माणदेश एक्सप्रेस न्यूज | मुंबई :
टायगर श्रॉफच्या चाहत्यांनी मोठ्या उत्सुकतेने वाट पाहिलेला बहुप्रतिक्षित ‘बागी ४’ चित्रपट अखेर प्रेक्षकांसमोर आला आहे. ट्रेलर रिलीज झाल्यानंतर या चित्रपटाबाबत बॉक्स ऑफिसवर धडाकेबाज कामगिरी होईल, अशी प्रेक्षकांसह चित्रपटसृष्टीतही अपेक्षा होती. मात्र, प्रत्यक्षात मात्र चित्रपटाने निराशाजनक कामगिरी करत निर्मात्यांची चिंता वाढवली आहे.
sacnilk च्या अहवालानुसार,
पहिल्या दिवशी : १२ कोटी
दुसऱ्या दिवशी : ९.२५ कोटी
तिसऱ्या दिवशी : १० कोटी
या आकड्यांनुसार, ३ दिवसांत फक्त ३१.२५ कोटी रुपयांचीच कमाई ‘बागी ४’ ला करता आली आहे. १२० कोटी रुपयांच्या प्रचंड बजेटच्या तुलनेत हा आकडा खूपच कमी मानला जात आहे. वर्ल्डवाइड स्तरावर चित्रपटाने ३८.५० कोटी रुपयांपर्यंत मजल मारली असली तरी अपेक्षित ‘बॉक्स ऑफिस धमाका’ घडवण्यात चित्रपट अपयशी ठरला आहे.
टायगर श्रॉफसोबत या चित्रपटात संजय दत्त, सोनम बाजवा आणि मिस युनिव्हर्स हरनाज संधू यांसारखी दमदार स्टारकास्ट आहे. विशेषतः टायगरच्या ॲक्शन सीन्स आणि स्टंट्सवर प्रेक्षकांची नेहमीच मोठी अपेक्षा असते. मात्र, प्रेक्षकांकडून मिळणारा थंड प्रतिसाद आणि समीक्षकांकडून मिळालेला नकारात्मक रिव्ह्यू यामुळे ‘बागी ४’ च्या यशाच्या शक्यता मंदावल्या आहेत.
‘बागी’ मालिकेतील आधीचे चित्रपट बॉक्स ऑफिसवर कमाईचे नवे रेकॉर्ड करताना दिसले होते. मात्र, ‘बागी ४’ मात्र त्या यशाची पुनरावृत्ती करू शकलेला नाही. पहिल्या वीकेंडमध्ये एवढ्या कमी कमाईमुळे, ‘बागी ४’ हा टायगर श्रॉफच्या कारकिर्दीतील सर्वात फ्लॉप चित्रपट ठरेल, अशी चर्चा सुरू झाली आहे.
आगामी आठवड्यात इतर मोठ्या चित्रपटांचे रिलीज होणार असल्याने ‘बागी ४’ च्या कमाईवर आणखी मर्यादा येऊ शकतात. निर्मात्यांसाठी हा मोठा आर्थिक धक्का ठरू शकतो. पुढील काही दिवसांत चित्रपटाने गती पकडली नाही तर ‘बागी ४’ बॉक्स ऑफिसवर सपशेल अपयशी ठरेल, असे चित्रपट समीक्षकांचे मत आहे.
‘बागी ४’ ने बॉक्स ऑफिसवर दमदार सुरुवात करण्याऐवजी प्रेक्षकांची निराशा केली आहे. टायगर श्रॉफच्या चाहत्यांसाठी ही मोठी खंत ठरत असून, बॉलीवूडसाठीही हा एक मोठा धक्का ठरला आहे.
