🟥 आटपाडी : परप्रांतीय कामगारांने शालेय मुलींचे फोटो काढले, संतप्त जमावाकडून धुलाई

July 11, 2025

1734

माणदेश एक्सप्रेस न्यूज | आटपाडी (प्रतिनिधी)
शहरातील शेटफळे चौक परिसरात परप्रांतीय कामगारांकडून शाळेत जाणाऱ्या मुलींचे छुप्या पद्धतीने फोटो काढल्याचा धक्कादायक प्रकार उघडकीस आला आहे. यामुळे परिसरात मोठा तणाव निर्माण झाला असून, संतप्त नागरिकांनी संबंधित युवकांची चांगलीच धुलाई केली.

घटनास्थळावरून मिळालेल्या माहितीनुसार, आज दुपारी अडीचच्या सुमारास काही परप्रांतीय युवक शेटफळे चौकात इमारतीचे काम करत होते. यावेळी गावातील काही शालेय मुली शाळा सुटल्यावर रस्त्याने जात होत्या. त्याच दरम्यान, या परप्रांतीय युवकांनी मोबाईलवर त्या मुलींचे फोटो काढल्याचे काही स्थानिक युवकांच्या लक्षात आले. त्यांनी तातडीने याची माहिती परिसरातील नागरिकांना दिली. यानंतर काही वेळातच आठ ते दहा युवक घटनास्थळी पोहचले आणि त्यांनी कामगारांना जाब विचारला. या वादाचे पर्यवसान हाणामारीत झाले. जमावाने परप्रांतीय युवकांना मारहाण केली.

आटपाडी शहरात रस्ते काम सुरु आहे. रस्त्याच्या कडेला असणारे लाईटचे खांब शिफ्ट करण्याचे काम सुरु आहे. सदर कामासाठी आटपाडी येथील शेटफळे चौकात सदरचे परप्रांतीय कामगार खांब लावण्यासाठी खड्डे खोदत होते. तसेच या ठिकाणी शालेय मुली घरी जाण्यासाठी चौकात थांबल्या होत्या. यावेळी तेथे काम करत असलेल्या परप्रांतीय कामगाराने मुलीसमोर जात आपल्या मोबाईलमध्ये फोटो काढले. यावेळी तेथे उपस्थित असलेल्या युवकांच्या लक्षात सदरची घटना लक्षात आल्यानंतर त्यांनी परप्रांतीय युवकांची धुलाई केली. यावेळी मोठ्या संख्येने नागरिक या ठिकाणी गोळा झाले होते. दरम्यान, या प्रकारामुळे विद्यार्थिनींच्या सुरक्षेबाबत पालकांमध्ये भीतीचे वातावरण निर्माण झाले आहे.