आटपाडी │ आगामी नगरपंचायत निवडणुकीच्या पार्श्वभूमीवर शहरातील राजकीय वातावरण दिवसेंदिवस तापत चालले आहे. आज नगरसेवक पदासह थेट नगराध्यक्षपदासाठी दिग्गज उमेदवारांचे अर्ज दाखल होण्याची शक्यता व्यक्त होत असून, सकाळपासूनच प्रशासन कार्यालयाबाहेर कार्यकर्त्यांची व समर्थकांची गर्दी वाढू लागली आहे. निवडणूक प्रक्रियेला फक्त दोन दिवस शिल्लक असल्याने उमेदवारांसह सर्वच राजकीय गटांनी शक्तीप्रदर्शनासाठी सज्जता पूर्ण केली आहे.
मिळालेल्या माहितीनुसार, अनेक संभाव्य उमेदवारांनी आजच नामनिर्देशन दाखल करून मोठ्या रॅली, बॅनर्स, ढोल-ताशे आणि समर्थकांच्या उपस्थितीत आपली ताकद दाखवण्याचे नियोजन केले आहे. काही गटांनी सूर्योदयापूर्वीच घरून ‘शुभारंभ पूजा’ करून कागदपत्रांची तयारी केली असून, सोशल मीडियावरदेखील त्यांच्या प्रचाराचा जोर वाढलेला दिसतो. शहरातील मुख्य चौक, व्यापारी पेठ आणि नगरपालिका परिसरात निवडणूक चर्चांना उधाण आले असून, नेमके कोणत्या गटातून कोण अर्ज दाखल करणार याबद्दल तर्कवितर्कांना उधाण आले आहे.
दरम्यान, राजकीय गणिते अजूनही अंतिम टप्प्यात पोहोचलेली नसल्याने युती आणि आघाड्या निश्चित होण्यास विलंब होत आहे. काही पक्षांतर्गत चर्चेत नावांचा निर्णय झाला असला तरी अधिकृत जाहीरातीसाठी वाट पाहण्यात येत आहे. एका गटातील उमेदवार दुसऱ्या गटात प्रवेश करत असल्याने स्थानिक पातळीवरील समीकरणे बदलण्याची चिन्हे स्पष्ट दिसत आहेत. त्यामुळे नगरपंचायत निवडणूक अधिकच रंजक होण्याची शक्यता व्यक्त केली जात आहे.
अर्ज दाखल प्रक्रियेला कमी वेळ उरलेला असताना शहरातील राजकीय कार्यालयांमध्ये बैठकांना आणि चर्चांना वेग आला आहे. समर्थकांच्या ओढाताणीमुळे गावे आणि प्रभागांमध्ये विभागणी वाढत असून, प्रत्येक गट आपले वर्चस्व सिद्ध करण्यासाठी प्रयत्न करताना दिसत आहेत. प्रशासनाने देखील संभाव्य गर्दी आणि गोंधळ लक्षात घेता सुरक्षा व्यवस्था वाढवली आहे.
आज दिग्गज उमेदवार अर्ज दाखल करतात की शेवटच्या दिवशी ‘सस्पेन्स’ कायम ठेवतात, याकडे संपूर्ण तालुक्याचे लक्ष लागले आहे. मात्र, या सर्व घडामोडींमुळे निवडणूक लढत चुरशीची होणार हे मात्र निश्चित आहे.
