🛑 आटपाडी नगरपंचायतीच्या भ्रष्टाचाराविरुद्ध दांडक्यांसह मोर्चा; जनतेचा रोष उसळला!

नगरपंचायतीचा कारभार म्हणजे भ्रष्टाचाराचा अजगर; आरक्षणात सूडबुद्धी, टेंडरमध्ये लूटमार, प्रशासन ढवळून निघणार!

माणदेश एक्स्प्रेस न्यूज | आटपाडी
आटपाडी नगरपंचायत ही जनतेच्या हितासाठी स्थापन झाली होती. पण आज ती काही राजकीय भिकाऱ्यांची खाजगी संपत्ती वाटावी, अशा पद्धतीने लुटली जात आहे. टेंडर घोटाळे, आरक्षणातील सूड, आणि बेछूट खर्चामुळे आटपाडीकरांच्या सहनशीलतेचा अंत झाला आहे. त्यामुळे सर्वपक्षीय आक्रमक मोर्चाची घोषणा भारत पाटील आणि आनंदराव पाटील यांनी पत्रकार परिषदेत केली. “मोर्चा शांततापूर्ण नसेल, आणि जो आडवा येईल, त्याला रस्त्यावर दांडक्याने उत्तर दिलं जाईल,” असा थेट इशाराच देण्यात आला!

🚨 टेंडर म्हणजे लूट! आरक्षण म्हणजे सूड! प्रशासन म्हणजे गाफील यंत्रणा!

भारत पाटील यांनी थेट आरोप केला की, “नगरपंचायतीने जणू ‘टेंडर मॅनेजमेंट’चा कोर्सच सुरू केला आहे. सगळं ठरवून टेंडर काढलं जातं, ठेकेदार ठरलेले, काम अपूर्ण आणि पैसे गिळलेले!”

ठळक घोटाळे:

• कचरा व्यवस्थापनाचा भोंगळ कारभार: कामगार व गाड्या नगरपंचायतीच्या; तरीही १.२५ कोटींचं खासगी टेंडर!

• पाईपलाइन, पूल, वीजवाटप, आठवडे बाजार वसुली: दररोज लाखोंचा गोरखधंदा

• दिवाबत्ती व पाणीपट्टी: पूर्ण अपारदर्शक व्यवहार

• शुद्धीकरण केंद्राजवळ मुख्याधिकाऱ्यांचे आलिशान ऑफिस: परवानगीशिवाय लाखोंचा खर्च — स्वतःसाठी दरबारी साजशृंगार!

🧨 आरक्षण हे राजकीय शस्त्र बनलं!

“प्रारूप विकास आराखड्यात आरक्षणचं राजकारण केलं गेलं. कोणत्या जागेवर कोणाचा व्यवसाय वाढेल, कोण बरबाद होईल हे राजकीय आकडेमोडीत ठरवलं जातं,” असा घणाघात पाटील यांनी केला. “ज्यांनी नगरपंचायतसाठी रक्त आटवलं, त्यांच्यावर सूड निघतोय, आणि राजकीय नातेवाईकांना लाभ मिळतोय!”

🛣️ रिंगरोडच्या नावाखाली भ्रष्ट रस्ता!

सांगली, विटा, तासगाव या मोठ्या शहरांमध्ये रिंग रोड नाही — पण आटपाडीत मात्र जनतेच्या डोक्यावर बिनदिक्कत प्रकल्प फेकला जातोय!

“हा रिंगरोड प्रकल्प जनतेशी चर्चा न करता ठरवण्यात आला. शेतकऱ्यांची जमीन, व्यापाऱ्यांचा व्यवसाय आणि सामान्य माणसाचं भविष्य उद्ध्वस्त करण्याचा घाट घातलाय,” असा आरोप आनंदराव पाटील यांनी केला.

🪓 मोर्चा म्हणजे शेवटचा इशारा!

“हा केवळ मोर्चा नाही, हे जनतेच्या संतापाचं दंड थोपटणं आहे!
जो हाणणार येईल, त्याला दांडक्यांनी उत्तर दिलं जाईल,” असा थेट इशारा भारत पाटील यांनी दिला.

या मोर्चामध्ये सर्वच राजकीय गट सहभागी होणार असून, त्यात —

• माजी आमदार राजेंद्र अण्णा देशमुख

• युवक जिल्हाध्यक्ष अनिल पाटील (राष्ट्रवादी – अजित पवार गट)

• आरपीआय जिल्हाध्यक्ष राजेंद्र खरात

• मनसे, शिवसेना आदी पक्षांचे कार्यकर्ते रस्त्यावर उतरणार आहेत.

⚖️ न्यायालयाच्या आदेशाने आलेली नगरपंचायत, पण लोकशाहीचा गळा दाबण्याचं राजकारण सुरू!

“२०१३ पासून १० वर्षे रस्त्यावर झिजलो, कोर्टात झुंजलो, आणि शेवटी नगरपंचायत अस्तित्वात आली. पण राजकीय श्रेय घेण्यासाठी काही मंडळींनी मंत्र्यांच्या हस्ते उद्घोषणा करून फसवणूक केली. ही जनतेची थट्टा आहे,” असा रोष भारत पाटील यांनी व्यक्त केला.

🔚 आता जनता उठतेय, थांबवा नाहीतर उलथवून टाका!

हा मोर्चा फक्त भ्रष्टाचारविरोधी नाही, तर सत्तेच्या अहंकाराला धडा शिकवणारा जनतेचा अभिव्यक्त क्रांतीचा आवाज आहे. आटपाडीच्या राजकारणात स्फोट घडवणाऱ्या या मोर्चामुळे येत्या काळात सत्ताधाऱ्यांच्या खुर्च्या हादरणार, हे निश्चित!