📰 दिघंचीत अमरसिंह देशमुखांचा हल्लाबोल : “आम्ही काम करून दाखवतो, काहीजण बोलण्यापलीकडे जात नाहीत!”

माणदेश एक्सप्रेस न्युज

दिघंची (प्रतिनिधी):

“आमच्यावर लोकांचा समज होता – आम्ही लय बोलतो. पण आज आम्ही दाखवून दिलंय, आम्ही बोलणारे नाही तर करणारे आहोत! दोन कोटी 27 लाखांची नवी शाळा उभी केली, शाळेला क्रांतीज्योती सावित्रीबाई फुले विद्यालय असं नाव दिलं, आणि विद्यालय परिसर आवारात, क्रांतीज्योती सावित्रीबाई फुले यांचा मुख्य पुतळा उभारला. जुनी शाळा पडझड झालेली होती, त्यात मुलांना बसवून काय उपयोग? म्हणून आम्ही निर्णय घेतला आणि थाटामाटात नवी शाळा उभी केली,” असा आक्रमक सूर सांगली जिल्हा परिषदेचे माजी अध्यक्ष अमरसिंह देशमुख यांनी दिघंची येथे लावला.

पुढे बोलताना ते म्हणाले, “1998 मध्ये बाबासाहेब देशमुख  बँक सुरू केली तेव्हा लोकांनी टिंगल केली. ‘वीस लाखाच्या ठेवी घेऊन काय बँक चालणार?’ असं हसले. पण आज या बँकेकडे तब्बल 405 कोटी ठेवी आहेत आणि 765 कोटींचा व्यवसाय आहे. हसणारे आता डोळे चोळतायत!”

“2008 मध्ये दूध संघ स्थापन केला. सुरुवातीला शंका घेतली, पण आज हा संघ 165 कोटींचा टर्नओव्हर करतोय. आमचं काम म्हणजे संस्थांना उभं करणं, विकास घडवणं.”

तालुक्यातील पाणी प्रश्नावर थेट वार करत देशमुख म्हणाले,

“टेंभूचं पाणी आलं, म्हणून तालुका आज समृद्ध झाला. पण अजूनही राजेवाडी तलावाचं पाणी दिघंची परिसराला मिळत नाही. माणगंगा नदीवरचे बंधारे वर्षातून एकदा तरी भरले पाहिजेत. पूर्वी हा भाग सधन होता, तो आता दुष्काळी छायेत आहे, आणि दुष्काळी असलेला भाग, सधन झाला आहे. ज्या भागात दुष्काळ होता, तिथं टेंभूने हिरवाई फुलवली – ही वस्तुस्थिती आहे!”

“1995 ला राजेंद्र अण्णा आमदार झाले आणि, तेव्हा टेंभूला मंजुरी मिळाली. पण त्यावेळचं सरकार पैशांच्या नावाखाली अडून बसलं. अनुशेषाच्या नावाखाली योजना रोखून धरली. नंतर युतीचं सरकार आलं, केंद्राकडून निधी आला आणि योजना पूर्ण झाली. आधी ज्यांच्याकडे मागितलं त्यांनी पाण्याऐवजी धुळफेक केली असल्याची टीका त्यांना नाव न घेता राष्ट्रवादी काँग्रेसवर केली!”

शेवटी चंद्रकांत पाटील यांना थेट आव्हान देत देशमुख म्हणाले,

“दादा, तुम्ही माणगंगा साखर कारखाना सुरू करा. तुम्ही मदत करा, मी खांद्याला खांदा लावून उभा आहे. तुम्ही सांगाल ते काम करून दाखवीन, आणि तुम्ही ज्याला आमदार म्हणाल त्याला मी आमदार करून दाखवीन!” असे सांगितले.