माणदेश एक्सप्रेस न्यूज
मुंबई/प्रतिनिधी :
छोट्या पडद्यावरील मालिका प्रेक्षकांसाठी नेहमीच मनोरंजनाचा तडका घेऊन येतात. टीआरपीच्या शर्यतीत टिकून राहण्यासाठी वाहिन्यांकडून सतत नवनवे प्रयोग होत असताना आता स्टार प्रवाह वाहिनीवर नव्या मालिकेची नांदी होत आहे. ‘नशीबवान’ या बहुचर्चित मालिकेतून लोकप्रिय अभिनेता आदिनाथ कोठारे तब्बल नऊ वर्षांनी छोट्या पडद्यावर पुनरागमन करत आहे. त्यामुळे मालिकेच्या प्रेक्षकांमध्ये उत्सुकतेचे वातावरण निर्माण झाले आहे.
१५ सप्टेंबरपासून प्रेक्षकांच्या भेटीला
आगामी १५ सप्टेंबरपासून ‘नशीबवान’ ही मालिका स्टार प्रवाह वाहिनीवर प्रसारित होणार आहे. कोठारे व्हिजनची निर्मिती असलेल्या या मालिकेबाबत प्रेक्षकांमध्ये सुरूवातीपासूनच वेगळीच चर्चा रंगली आहे. अभिनेत्री रुपाली भोसलेच्या प्रमुख भूमिकेतील ‘लपंडाव’ मालिकेनंतर आता या वाहिनीने ‘नशीबवान’ची झलक प्रेक्षकांसमोर आणली आहे.
कलाकारांची दमदार फळी
या मालिकेत अभिनेता अजय पूरकर आणि अभिनेत्री प्राजक्ता केळकर सहाय्यक भूमिकेत झळकणार आहेत. विशेष म्हणजे, अभिनेत्री नेहा नाईक हिचे छोट्या पडद्यावरील पहिले पदार्पण या मालिकेतून होत आहे. परंतु सर्वाधिक लक्ष वेधून घेत आहे ते आदिनाथ कोठारेच्या एन्ट्रीने.
आदिनाथची पुनरागमन एन्ट्री
२०१६ मध्ये प्रदर्शित झालेल्या ‘१०० डेज’ मालिकेनंतर तब्बल नऊ वर्षांनी आदिनाथ कोठारे छोट्या पडद्यावर कमबॅक करत आहे. ‘नशीबवान’मध्ये तो रुद्र प्रताप घोरपडे ही दमदार भूमिका साकारणार आहे. त्याच्या आगमनाने मालिकेला नक्कीच वेगळं वजन मिळणार असून प्रेक्षकांना एक नवीन अनुभव मिळेल, असा विश्वास व्यक्त होत आहे.
चाहते उत्सुक
आदिनाथ कोठारे हा मराठी चित्रपट, वेबसीरिज आणि हिंदी चित्रपटांमध्ये झळकत असला तरी छोट्या पडद्यावरील त्याच्या कमबॅकची चाहत्यांना विशेष प्रतीक्षा होती. त्यामुळे ‘नशीबवान’च्या प्रसारणाची उत्सुकता आता अधिकच वाढली आहे.
View this post on Instagram
