माणदेश एक्सप्रेस न्यूज | इस्लामपूर :
सांगली जिल्ह्यातील इस्लामपूर-सांगली महामार्गावर बुधवारी सकाळी झालेल्या अपघातात अभयनगर (सांगली) येथील तरुणाचा जागीच मृत्यू झाला. केवळ २६ वर्षांच्या तरुणाचे अपघातात निधन झाल्याने परिसरात हळहळ व्यक्त केली जात आहे. मृत तरुणाचे नाव मंगेश विजयकुमार माळी (रा. अभयनगर
, सांगली) असे असून ते पुण्यातील एका खासगी कंपनीत नोकरीस होते.
कसा झाला अपघात?
पोलिसांकडून मिळालेल्या माहितीनुसार, मंगेश माळी हे बुधवारी सकाळी दुचाकी (एमएच-१० सीजे-३९५१) घेऊन सांगलीकडे जात होते. सुमारे सकाळी दहा वाजता ते इस्लामपूर-सांगली रस्त्यावर उरुणवाडी गावाजवळ पोहोचले असता अज्ञात कारने त्यांच्या दुचाकीला जोरदार धडक दिली. धडक एवढी भीषण होती की दुचाकीचा तोल जाऊन मंगेश रस्त्यावर फेकले गेले.
त्यांच्या डोक्याला गंभीर मार लागला होता. डोक्यातून अतिप्रमाणात रक्तस्राव झाल्यामुळे काही क्षणांतच त्यांनी घटनास्थळी प्राण सोडले. स्थानिकांनी तत्काळ मदतीसाठी धाव घेतली; मात्र तोपर्यंत उशीर झाला होता. अपघात घडवून कारचालक मात्र घटनास्थळावरून पसार झाला.
पोलिसांची कारवाई
अपघाताची माहिती मिळताच इस्लामपूर पोलिसांनी घटनास्थळी धाव घेतली. मृतदेह इस्लामपूर ग्रामीण रुग्णालयात शवविच्छेदनासाठी हलवण्यात आला. या प्रकरणी अज्ञात वाहनचालकाविरोधात गुन्हा दाखल करण्यात आला असून, सीसीटीव्ही फूटेज व स्थानिकांकडून माहिती घेऊन पोलिस तपास करत आहेत.
कुटुंबावर दुःखाचा डोंगर
अचानक झालेल्या या अपघातामुळे माळी कुटुंबावर दुःखाचा डोंगर कोसळला आहे. वडील विजयकुमार माळी हे सेवानिवृत्त कर्मचारी असून, कुटुंबात आई-वडील, भाऊ-बहीण असा परिवार आहे. मंगेश हे घरातील कर्तबगार व सर्वांच्या आशा-अपेक्षांचे केंद्रबिंदू होते. नोकरीनिमित्त ते पुण्यात राहात असले तरी, सुट्टी मिळाली की कुटुंबासोबत वेळ घालवण्यास ते सांगलीला परत येत.
मंगेशच्या निधनाने त्यांच्या मित्रपरिवार, शेजारी व अभयनगर परिसरात शोककळा पसरली आहे. अंत्यसंस्कार सांगलीत शोकाकुल वातावरणात पार पडले.
वारंवार होणारे अपघात आणि नागरिकांचा संताप
इस्लामपूर-सांगली महामार्गावर गेल्या काही महिन्यांत अपघातांचे प्रमाण वाढले आहे. महामार्गावर वाहनांची धावपळ, वेगमर्यादा न पाळणे, सिग्नल व ट्रॅफिक नियमांकडे दुर्लक्ष करणे, तसेच काही ठिकाणी अपुऱ्या रस्त्यावरील सुविधांमुळे अपघात घडत असल्याची तक्रार स्थानिक नागरिकांनी केली आहे. या रस्त्यावर सातत्याने होणारे अपघात लक्षात घेता प्रशासनाने उपाययोजना कराव्यात, अशी मागणी नागरिकांनी केली आहे.
