माणदेश एक्सप्रेस न्यूज | जालना
मराठा आरक्षण आंदोलनाचे नेते मनोज जरांगे पाटील यांनी केलेल्या गंभीर आरोपांनी महाराष्ट्राचे राजकारण पुन्हा एकदा हादरवले आहे. जरांगे पाटील यांनी त्यांच्या हत्येचा कट रचल्याचा आणि तो थेट मंत्री धनंजय मुंडे यांनी रचल्याचा दावा केला आहे. पत्रकार परिषद घेत त्यांनी दोन वेळा त्यांच्या जीवावर हल्ला करण्याचा प्रयत्न झाल्याचे सांगत राज्यातील प्रशासन आणि राजकीय वर्तुळात एकच खळबळ उडवून दिली आहे.
मनोज जरांगे पाटील म्हणाले, “मी जालना पोलिसांकडे तक्रार दिली आहे. माझ्या हत्येची सुपारी धनंजय मुंडेंनी दिली आहे. या मागे बीड आणि जालना जिल्ह्यातील काही लोक आहेत. हे लोक सर्वच राजकीय पक्षांशी संबंधित आहेत. त्यामुळे या प्रकरणात कोणते राजकीय हात आहेत, हे सर्वांना ठाऊक आहे.”
जरांगे पुढे म्हणाले, “एक कार्यकर्ता जो बीडचा आहे, तो या दोन आरोपींपर्यंत पोहोचला. त्यानेच संपूर्ण कट आखण्यास सुरुवात केली. सुरुवातीला माझ्याविरोधात खोटे रेकॉर्डिंग बनवण्याचा कट होता. मात्र, नंतर त्यांनी थेट माझ्या जीवावर उठण्याचा निर्णय घेतला.”
जरांगे पाटील यांनी पत्रकार परिषदेत सांगितले की, “पहिल्यांदा मला विषारी गोळ्या देऊन मारण्याचा कट होता. यानंतर माझ्या गाडीला अपघात दाखवून धडक देण्याचा प्रयत्न करायचा होता. दोन्ही प्रयत्नांमध्ये मी कसाबसा वाचलो.”
ते पुढे म्हणाले, “छत्रपती संभाजीनगरजवळ आरोपींची धनंजय मुंडेंशी भेट झाली होती. तिथे मुंडेंनी त्यांना गोळ्या देण्यास सांगितले. दुसऱ्या टप्प्यात माझ्या वाहनाला दुसऱ्या वाहनाने धडक देण्याची योजना होती. हे सगळं एक नियोजित षडयंत्र होतं.”
मनोज जरांगे पाटील यांनी या कटामागे मोठा आर्थिक व्यवहार झाल्याचा दावा केला आहे. ते म्हणाले, “बीडचा कांचन पाटील नावाचा माणूस आहे. तो धनंजय मुंडेंचा कार्यकर्ता किंवा पीए आहे. त्याच्याद्वारे हे षडयंत्र रचले गेले. बीडच्या कार्यकर्त्यांनी आरोपींना परळीला नेले, जिथे धनंजय मुंडेंनी एक मोठी बैठक सोडून त्यांच्याशी स्वतंत्र भेट घेतली.”
जरांगे पुढे म्हणाले, “या बैठकीत अडीच कोटी रुपयांची डील झाली. भाऊबीजेच्या दिवशीच ही बैठक पार पडली होती. एका आरोपीने म्हटले की, ‘मला जुनी गाडी द्या, मी गाडीनेच ठोकतो’. म्हणजे हल्ला अपघातासारखा दाखवण्याचा कट होता.”
जरांगे पाटील यांनी अत्यंत संतप्त भाषेत प्रतिक्रिया देताना म्हटले, “धनंजय मुंडे यांचे हे नपुंसक चाळे आहेत. त्यांनी थेट येऊन भिडावे. घातपात करून माणूस राजकारणात मोठा होत नाही. लोकांचा विश्वास आणि प्रामाणिकपणा यातूनच मोठेपणा मिळतो. पण या सगळ्या घटनांमुळे मराठा आंदोलन दाबण्याचा प्रयत्न दिसतोय.”
या प्रकरणात मनोज जरांगे पाटील यांनी जालना पोलिसांकडे अधिकृत तक्रार दाखल केली आहे. पोलिसांनी या तक्रारीची नोंद घेतली असून तपास सुरू केल्याची माहिती मिळत आहे. मात्र, अद्याप या आरोपांबाबत धनंजय मुंडे किंवा त्यांच्या कार्यालयाकडून कोणतीही प्रतिक्रिया आलेली नाही.
दरम्यान, जरांगे यांच्या या आरोपांमुळे मराठा आंदोलनाच्या पार्श्वभूमीवर राज्यातील राजकीय वातावरण तापले आहे. विरोधकांनी सरकारकडून तात्काळ चौकशीची मागणी केली आहे.
मनोज जरांगे पाटील हे गेल्या वर्षभरात मराठा आरक्षणासाठीच्या लढ्याचे प्रमुख चेहरे ठरले आहेत. त्यांनी जालना जिल्ह्यातून सुरू केलेल्या आंदोलनाने राज्य सरकारला निर्णय घ्यावा लागला होता. त्यांच्या आंदोलनामुळे सरकारवर मोठा दबाव आला होता. आता त्यांनीच सरकारमधील एका मंत्र्यावर हत्येचा कट रचल्याचा आरोप केल्याने परिस्थिती अधिक गंभीर बनली आहे.
मनोज जरांगे पाटील यांच्या आरोपांनी राज्याच्या राजकारणात मोठा भूचाल निर्माण केला आहे. जरांगे यांचा जीव घेण्याचा प्रयत्न, त्यामागील कथित आर्थिक व्यवहार आणि मंत्र्यांवरील थेट आरोप — या सगळ्यामुळे आगामी काळात महाराष्ट्रातील राजकीय वातावरण आणखी तापणार आहे
