माणदेश एक्सप्रेस न्यूज | मुंबई
बॉलिवूड अभिनेत्री शिल्पा शेट्टी आणि तिचे पती राज कुंद्रा पुन्हा एकदा वादाच्या भोवऱ्यात सापडले आहेत. यापूर्वी पॉर्नोग्राफी प्रकरणामुळे खळबळ उडाल्यानंतर आता त्यांच्या कंपनीविरोधात ६० कोटी रुपयांच्या कथित आर्थिक फसवणुकीचे प्रकरण समोर आले आहे. मुंबई पोलिसांच्या आर्थिक गुन्हे शाखेने (EOW) या प्रकरणात कंपनीच्या माजी कर्मचाऱ्यांना समन्स बजावले असून, पुढील टप्प्यात फॉरेन्सिक ऑडिट करण्याचे आदेश देखील देण्यात आले आहेत.
राज कुंद्रा यांच्या ‘बेस्ट डील प्रायव्हेट लिमिटेड’ या कंपनीच्या आर्थिक व्यवहारांमध्ये अनियमितता आढळल्याचा संशय व्यक्त होत आहे. या प्रकरणातील तपासाची दिशा आता अधिक गंभीर झाली असून, आर्थिक गुन्हे शाखेने कंपनी आणि तिच्या संलग्न संस्थांच्या व्यवहारांची फॉरेन्सिक तपासणी करण्याचा निर्णय घेतला आहे. सूत्रांच्या माहितीनुसार, पुढील आठवड्यात ऑडिटरची नियुक्ती केली जाईल आणि संपूर्ण वित्तीय घडामोडींचा मागोवा घेतला जाईल.
या प्रकरणात कंपनीचे माजी मुख्य वित्तीय अधिकारी (CFO) आणि काही माजी संचालकांसह अनेक कर्मचाऱ्यांचे जबाब आधीच नोंदवले गेले आहेत. मात्र, काही उर्वरित कर्मचाऱ्यांना येत्या काही दिवसांत चौकशीसाठी हजर राहण्याचे आदेश देण्यात आले आहेत.
EOW सूत्रांनी सांगितले की, सर्व जबाब नोंदवल्यानंतर परिस्थितीनुसार राज कुंद्रा यांनाही पुन्हा चौकशीसाठी बोलावण्यात येऊ शकते.
या प्रकरणात न्यायालयाने देखील अनेक गंभीर प्रश्न उपस्थित केले आहेत. कर्मचाऱ्यांचे वेतन कंपनीच्या नफ्यातून दिले जात होते का? की इतर कुठल्या स्त्रोतामधून त्यासाठी निधी मिळत होता? या संदर्भात आर्थिक प्रवाहाचे स्रोत शोधण्याचे काम सुरु आहे.
तसेच कंपनीच्या ऑफिस फर्निचरसाठी तब्बल २० कोटी रुपये खर्च झाल्याची माहिती समोर आली असून, या संदर्भातील कंत्राटदार कंपन्यांची देखील चौकशी सुरु आहे.
या प्रकरणात शिल्पा शेट्टीने काही दिवसांपूर्वी न्यायालयाकडे परदेश प्रवासासाठी परवानगी मागितली होती. मात्र, न्यायालयाने तिची याचिका फेटाळून लावत स्पष्ट शब्दांत म्हटले की,
“आधी फसवणुकीची रक्कम भरा आणि नंतर प्रवासाचा विचार करा.”
ही पहिली वेळ नाही की शिल्पा शेट्टी आणि राज कुंद्रा कायदेशीर अडचणीत आले आहेत. याआधीही राज कुंद्रा पॉर्नोग्राफी प्रकरणात अटक झाल्यानंतर जवळपास महिनाभर तुरुंगात राहिला होता. त्यानंतर त्याला जामिनावर सुटका मिळाली, परंतु त्यांची प्रतिमा मोठ्या प्रमाणात मलिन झाली.
त्यानंतरही संपत्ती आणि गुंतवणूक प्रकरणांमध्ये या दांपत्याचे नाव अनेक वेळा चर्चेत राहिले आहे.
सध्या आर्थिक गुन्हे शाखेकडून सर्व कागदपत्रे, खातेवही आणि डिजिटल डेटा जप्त करण्यात येत आहेत. फॉरेन्सिक ऑडिट अहवाल आल्यानंतर, जर निधीच्या हालचालीत कायदेशीर उल्लंघन किंवा फसवणुकीचा पुरावा सापडला, तर राज कुंद्रा आणि संबंधित अधिकारी यांच्यावर गुन्हेगारी कलमांखाली कठोर कारवाई होऊ शकते.
राज कुंद्रा आणि शिल्पा शेट्टी या दोघांनाही या नव्या प्रकरणामुळे पुन्हा कायदेशीर चौकटीत ओढलं गेलं आहे. बॉलिवूडमधील या दांपत्यावर सर्वांच्या नजरा लागल्या आहेत. तपास पूर्ण झाल्यानंतर नेमकी फसवणूक कोणत्या पातळीवर आणि कोणाच्या संगनमताने झाली हे स्पष्ट होईल, मात्र सध्या तरी ‘बेस्ट डील प्रायव्हेट लिमिटेड’वरील संशय अधिकच गडद झाला आहे.
