माणदेश एक्सप्रेस न्यूज | पुणे :
पुणे जिल्ह्यातील शिरूर तालुक्यातील पिंपरखेड परिसरात बिबट्याच्या दहशतीने पुन्हा एकदा जीव घेतला आहे. अवघ्या 10 वर्षांच्या रोहन विलास बोंबे या चिमुकल्यावर रविवारी संध्याकाळी बिबट्याने हल्ला करून ठार मारले. या हृदयद्रावक घटनेमुळे गावात शोककळा पसरली असून कुटुंबीयांसह संपूर्ण गावात संतापाची लाट उसळली आहे.
घटनेनंतर संतप्त ग्रामस्थांनी आक्रमक भूमिका घेत वनविभागाच्या वाहनाला आणि कार्यालयाला आग लावली. तसेच मृत मुलाचे अंत्यसंस्कार करण्यास नकार देत प्रथम बिबट्याचा बंदोबस्त करा, त्यानंतरच अंत्यसंस्कार करू अशी भूमिका ग्रामस्थांनी घेतली. यामुळे वातावरण आणखी तापले.
घटनेनंतर पंचतळे आणि रोडेवाडी फाटा येथे बेल्हे-जेजुरी महामार्ग तसेच अष्टविनायक मार्ग रोखून संतप्त नागरिकांनी रास्ता रोको केला. तब्बल तीन तास महत्त्वाचे मार्ग ठप्प राहिल्याने वाहतुकीचा ताण वाढला आणि मोठी कोंडी झाली. पोलिस आणि महसूल यंत्रणा घटनास्थळी दाखल झाली. चर्चा करून सुमारे सात तासांनंतर आंदोलन तात्पुरते स्थगित करण्यात आले.
ग्रामस्थांची मागणी एकच —
“बिबट्यांचा कायम बंदोबस्त करा, नाहीतर प्रशासनाला विश्रांती नाही!”
ग्रामस्थांचा रोष अद्याप ओसरलेला नसून आज (सोमवार) पुन्हा मंचर येथे पुणे-नाशिक महामार्गावर मोठ्या प्रमाणावर रास्ता रोको होणार आहे. स्थानिक आमदार शरद सोनावणे हेही याठिकाणी उपस्थित राहणार आहेत. या भागातील सर्व गावांनी बंद पाळण्याचा निर्णय घेतला आहे.
पिंपरखेड आणि जांबूत परिसरात बिबट्याच्या हल्ल्यांची मालिका सुरू आहे. अवघ्या 10 दिवसांत दोन निरागस लेकरांचा बळी गेला असून महिन्याभरात ही तिसरी घटना आहे. दरवेळी आश्वासनं मिळतात पण ठोस उपाययोजना शून्य, अशी ग्रामस्थांची नाराजी.
या दुःखद घटनेनंतर शिरूरचे खासदार डॉ. अमोल कोल्हे यांनी मुख्यमंत्री आणि मुख्य वनसंरक्षकांना पत्र पाठवून कठोर भूमिका घेतली आहे. त्यांनी नरभक्षक बिबट्यांना ठार मारण्यासाठी तातडीने Elimination Order काढण्याची मागणी केली आहे.
त्यांनी स्पष्ट इशारा दिला —
“माता-भगिनी आणि लहान मुले भरदिवसा मारली जात असताना सरकार नुसते बघ्याची भूमिका घेते आहे. हा जनतेच्या सहनशक्तीचा अंत आहे. एकही क्षण न दवडता निर्णय घ्या.”
ग्रामस्थांनी सरकारवर गंभीर आरोप केले आहेत.
वनविभाग अपयशी
तैनाती असूनही हल्ल्यांची मालिका कायम
तातडीचे प्रतिसाद यंत्रणा कार्यरत नाही
केवळ बैठका आणि आश्वासनं
गावकऱ्यांचे भावना:
“आता आमची मुलं मृत्यूला वाहून झालंय. प्रशासनाचे डोळे केव्हा उघडणार?”
जिल्हा प्रशासन, वनविभाग आणि पोलीस दलाने परिस्थिती नियंत्रणात आणण्यासाठी रात्री उशिरापर्यंत बैठक घेतली. काही पिंजरे आणि पथके तैनात करण्यात आली असून परिसरात गस्ती वाढवण्यात आली आहे. मात्र गावकऱ्यांचा ठाम पवित्रा पाहता परिस्थिती गंभीर असल्याचे चित्र आहे.
पिंपरखेड परिसरात मानव-वन्यजीव संघर्षाने भीषण रूप घेतले आहे. प्रशासनाच्या कारवाईवर प्रश्नचिन्ह उपस्थित झाले असून ग्रामस्थांचा संयम सुटण्याच्या मार्गावर आहे. राज्य सरकारने तात्काळ हस्तक्षेप करून ठोस उपाययोजना न केल्यास आंदोलन आणखी तीव्र होण्याची शक्यता आहे.
