माणदेश एक्सप्रेस न्यूज | पुणे :
एकेकाळी संस्कृती, शिक्षण आणि सभ्यता यासाठी प्रसिद्ध असलेले पुणे शहर आज गुन्हेगारीच्या सावटाखाली आल्याची तीव्र खंत शिवसेना (उद्धव बाळासाहेब ठाकरे गट) नेते आणि खासदार संजय राऊत यांनी व्यक्त केली आहे. “भाजप आणि उपमुख्यमंत्री अजित पवार यांच्या राजकीय आशीर्वादामुळे पुणे गुंडांचे माहेरघर बनले आहे,” असा थेट आरोप करत त्यांनी राज्य सरकार आणि गृह खात्याच्या कार्यप्रणालीवर सडकून टीका केली आहे.
राऊत म्हणाले की, “पुणे विद्येचं माहेरघर म्हणून ओळखलं जात होतं. आज मात्र ते गुंडांचं माहेरघर झालं आहे. गेल्या काही महिन्यांपासून कोयता गँग, मोक्का आरोपी, अमली पदार्थ विक्रेते आणि खंडणीखोर टोळ्या उघडपणे फिरताना दिसत आहेत. कायद्याचा आणि प्रशासनाचा धाक उरलेला नाही.”
त्यांनी भाजप आणि अजित पवार गटावर टीका करताना म्हटलं की, “राजकीय छत्रछाया मिळाल्यामुळेच हे गुंड उन्मत्त झाले आहेत. सत्ता मिळाली की काही जणांना वाटतं की, पोलिसही त्यांच्याच ताब्यात आहेत. पण ही परिस्थिती धोकादायक आहे. पुण्यासारख्या सांस्कृतिक शहराची प्रतिमा गुन्हेगारीमुळे मलीन होत आहे.”
राऊत यांनी पुढे नाशिक पोलिसांच्या धाडसी धोरणाचे कौतुक करत म्हटले की, “नाशिकचे पोलीस आयुक्त संदीप कर्णिक यांनी मुख्यमंत्री एकनाथ शिंदे यांच्या आदेशानुसार कोणत्याही राजकीय दबावाला न जुमानता गुन्हेगारांवर कठोर कारवाई केली. कोणताही पक्ष, कोणताही नेता किंवा कोणतंही संबंध न पाहता गुंडांचे अड्डे उद्ध्वस्त करण्याची ही पद्धत अत्यंत प्रशंसनीय आहे.”
त्यांनी पुढे अशी अपेक्षा व्यक्त केली की, “पुणे आणि ठाण्यातही अशीच मोहीम हाती घेण्यात यावी. पुण्याच्या पोलिसांना मुक्तहस्त देऊन राजकीय हस्तक्षेपाशिवाय गुन्हेगारीवर आळा घालावा. पुण्याची बदनामी आता थांबली पाहिजे. हे प्रकरण राज्याच्या गृहमंत्र्यांनी गांभीर्याने घ्यावे.”
राऊत यांच्या वक्तव्यानंतर राजकीय वर्तुळात खळबळ माजली असून, भाजपकडून अद्याप कोणतीही अधिकृत प्रतिक्रिया आलेली नाही. मात्र, राऊत यांच्या या विधानामुळे पुण्यातील वाढत्या गुन्हेगारीचा मुद्दा पुन्हा एकदा चर्चेत आला आहे.
राऊत यांच्या या वक्तव्याकडे राजकीय निरीक्षकांच्या मते, आगामी स्थानिक स्वराज्य निवडणुकांच्या पार्श्वभूमीवर टीकास्त्र म्हणून पाहिले जात आहे. पुण्यात अलीकडेच झालेल्या काही गंभीर घटनांमुळे नागरिकांत भयाचे वातावरण निर्माण झाले आहे. त्यामुळे राऊत यांची ही टीका सामान्य नागरिकांच्या भावनांनाही जवळ जाणारी ठरत आहे.
