माणदेश एक्स्प्रेस न्यूज | सांगली :
शहरातील रतनशीनगरजवळील अंबाईनगर या उच्चभ्रू वस्तीत गुरुवारी (ता. ३) रात्री उशिरा थरारक घटना घडली. दोन रेकॉर्डवरील गुन्हेगारांनी कापड दुकानदाराच्या बंगल्यात शिरून एअर गन आणि चाकूच्या धाकाने सोने व पैशांची मागणी केली. मात्र, प्रसंगावधान राखून घरातील महिलेने शेजाऱ्यांना सतर्क केल्याने परिसरातील नागरिकांनी धाडस दाखवत दोन्ही गुन्हेगारांना पकडले आणि बेदम चोप दिला. पोलिस वेळेवर पोहोचल्याने दोघांचा जीव वाचला. सांगली शहर पोलिसांनी या गुन्हेगारांना अटक केली असून न्यायालयाने सहा ऑक्टोबरपर्यंत पोलिस कोठडी सुनावली आहे.
अंबाईनगर परिसरात कापड दुकानदार दिवेश नरेंद्र शहा (वय ५५) यांचा आलिशान बंगला आहे. गुरुवारी रात्री पावणे दहाच्या सुमारास शहा दाम्पत्य घरी होते. त्याच वेळी दोन गुन्हेगार सौरभ रवींद्र कुकडे (रा. दत्तनगर, पसायदान शाळेजवळ, सांगली) आणि रोहित बंडू कटारे (रा. फौजदार गल्ली) हे दोघे बंगल्यासमोर आले. बेल वाजवल्यानंतर शहा यांनी दरवाजा उघडताच गुन्हेगार आत घुसले.
हाती एअर गन व चाकू घेऊन त्यांनी शहा यांना धमकावत “सोने व पैसे द्या, नाहीतर जिवंत सोडणार नाही” अशी धमकी दिली. त्यामुळे शहा घाबरले असतानाच त्यांच्या पत्नीने हा प्रकार पाहिला. प्रसंगावधान राखत त्यांनी पाठीमागील दरवाजातून बाहेर जाऊन शेजारील नागरिकांना बोलावले.
काही क्षणांतच परिसरातील नागरिक काठ्या घेऊन बंगल्यासमोर जमले. नागरिकांना पाहून गुन्हेगारांनी पळून जाण्याचा प्रयत्न केला, मात्र नागरिकांनी त्यांना पकडले. जमावाने दोघांना लाथाबुक्क्या आणि काठ्यांनी बेदम मारहाण केली. या मारहाणीमुळे दोघे रक्तबंबाळ झाले.
दरम्यान, हा प्रकार पोलिसांना कळताच उपनिरीक्षक महादेव पोवार आणि कर्मचारी गौतम कांबळे घटनास्थळी धावले. संतप्त जमावाच्या तावडीतून दोघांना वाचवून पोलिसांनी त्यांना कस्टडीत घेतले. नागरिक पोलिसांसमोरही संतप्त झाले होते व गुन्हेगारांना पुन्हा मारण्याचा प्रयत्न केला. मात्र पोलिसांनी कायदा हातात घेऊ नका, असे बजावल्याने जमाव शांत झाला.
जखमी गुन्हेगारांना तातडीने जिल्हा शासकीय रुग्णालयात दाखल करण्यात आले. उपचारानंतर त्यांना अटक करून शुक्रवारी न्यायालयासमोर हजर करण्यात आले. न्यायालयाने सहा ऑक्टोबरपर्यंत पोलिस कोठडी सुनावली आहे.
सांगली पोलिसांनी दिलेल्या माहितीनुसार, सौरभ कुकडे याच्याविरुद्ध यापूर्वी खुनासह गंभीर गुन्ह्यांची नोंद आहे. तर रोहित कटारे याच्यावर दरोड्याचा गुन्हा दाखल आहे. या दोघांची गुन्हेगारी पार्श्वभूमी लक्षात घेता पोलिस कोठडीत चौकशीदरम्यान आणखी गुन्हे उघड होण्याची शक्यता आहे.
या प्रकारानंतर अंबाईनगर परिसरात खळबळ उडाली. रात्री उशिराच्या वेळी घडलेला हा प्रकार ऐकून नागरिक धास्तावले आहेत. मात्र शहाणपणाने आणि धाडसाने प्रसंगाला सामोरे जाणाऱ्या शहा दाम्पत्याचे तसेच गुन्हेगारांना पकडणाऱ्या परिसरातील नागरिकांचे कौतुक होत आहे. पोलिसांनीही नागरिकांच्या सहकार्यामुळे गुन्हेगारांना अटक करणे शक्य झाले, असे सांगितले.
सांगलीत एअर गनच्या धाकाने झालेला हा लूटप्रयत्न हाणून पाडण्यात नागरिकांनी मोठी भूमिका बजावली. पोलिसांच्या तत्पर कारवाईमुळे जमावाकडून दोघांचे प्राण वाचले. तरीही शहरातील वाढत्या गुन्हेगारी घटनांमुळे नागरिकांत भीतीचे वातावरण निर्माण झाले आहे.
