माणदेश एक्सप्रेस न्यूज | मुंबई :
नुकत्याच पार पडलेल्या उपराष्ट्रपती पदाच्या निवडणुकीनंतर विरोधी आघाडीतील मतफुटीचा मुद्दा पुन्हा ऐरणीवर आला आहे. इंडिया आघाडीचे उमेदवार बी. सुदर्शन रेड्डी यांना अपेक्षेपेक्षा कमी मते मिळाल्यानंतर शिवसेना (उद्धव ठाकरे गट) नेते व खासदार संजय राऊत यांनी दिल्लीतील पत्रकार परिषदेत महत्त्वाची विधाने केली.
राऊत यांनी सांगितले की, “इंडिया आघाडीने ही निवडणूक चांगल्या पद्धतीने लढली. आमच्या उमेदवाराला ३०० मते मिळाली. आमची एकत्रित ताकद ३१४ होती. मात्र १५ मते अवैध ठरवली गेली आणि ती मते नेमकी इंडिया आघाडीच्या उमेदवाराला मिळणारी होती, हे स्पष्ट आहे. निवडणूक अधिकारी कोणाचे असतात, हे सगळ्यांना माहिती आहे. महाराष्ट्राच्या निवडणुकीत जे घडले होते, त्याच धर्तीवर इथेही खेळ झाला आहे.”
‘फक्त १० मतं फोडण्यात भाजपला यश’
भाजपकडून क्रॉस व्होटिंगबाबत उठवलेल्या मुद्द्यावर राऊत म्हणाले, “हो, क्रॉस व्होटिंग झाली असेल. पण एवढी प्रचंड ताकद असूनही भाजपला फक्त १० मतं फोडता आली. ही १० मतं कोणती असतील, याचा अंदाज आम्हाला सुरुवातीपासूनच होता. आम्ही निराश नाही. आम्ही लढलो आणि ३०० च्या आकड्यावर थांबलो. हा आकडा काही लहान नाही. संसदेत विरोधी पक्षाची एकत्रित ताकद ३०० ही मोठी आहे.”
त्यांनी पुढे स्पष्ट केले की, “आमचे उमेदवार सुदर्शन रेड्डी यांनी चांगली निवडणूक लढली. विरोधी पक्षांची एकजूट दिसली. जयदीप धनखड यांना मिळालेली मतं ७५ टक्के होती. आता राधाकृष्णन यांना मिळालेल्या मतांत प्रचंड तफावत आहे. मात्र, ३०० ही आमच्या ताकदीची पक्की खूण आहे.”
फडणवीसांवर थेट टीका
पत्रकार परिषदेत राऊत यांनी महाराष्ट्राचे उपमुख्यमंत्री देवेंद्र फडणवीस यांच्यावरही निशाणा साधला. “एनडीएची काही मते तटस्थ राहिली. केसीआरसह काही पक्ष तटस्थ राहिले. भाजपचीही काही मते तटस्थ राहिली. हे का झाले, याचे उत्तर फडणवीसांनी द्यावे. त्याआधी त्यांनी महाराष्ट्रात स्वतःचे राजकीय स्थान वाचवावे,” अशी टीका त्यांनी केली.
नेपाळ आंदोलनावर भाष्य
दरम्यान, नेपाळमधील आंदोलन आणि हिंसाचाराच्या पार्श्वभूमीवर संजय राऊत यांचे ट्विट चर्चेत आले होते. त्यावर भाष्य करताना ते म्हणाले, “नेपाळची सीमा अनेक भारतीय राज्यांना जोडते. सध्या तिथे जे आंदोलन सुरू आहे, ते सरकारविरोधी आहे. भारतात ७५ लाख नेपाळी राहतात. भारत-नेपाळ यांचे नाते हे ‘मोठा भाऊ-लहान भाऊ’ असे आहे. भारतातील युवा शांत दिसतोय, पण त्यालाही अनेक समस्या आहेत. पंतप्रधान गरीबांना राशन वाटत आहेत म्हणजे लोक खरोखरच गरीब आहेत. महात्मा गांधींचा जन्म या भूमीत झाला, म्हणून हे लोकं वाचली आहेत.”
निष्कर्ष
उपराष्ट्रपती निवडणुकीतील परिणाम आणि त्यानंतरची मतफुटी यावरून इंडिया आघाडी व भाजप यांच्यातील संघर्ष पुन्हा एकदा तीव्र झाला आहे. इंडिया आघाडीने ३०० मतांपर्यंत मजल मारली असली तरी अवैध मतं आणि भाजपकडून कथित मतफुटीमुळे वादंग निर्माण झाला आहे. राऊतांच्या वक्तव्यामुळे पुढील काही दिवसात राजकीय आरोप-प्रत्यारोप अधिकच चिघळण्याची शक्यता आहे.
