माणदेश एक्सप्रेस न्यूज | पुणे :
राज्य सरकारने अखेर मोठ्या प्रतीक्षेनंतर पोलिस दलातील शिपाई पदांच्या भरतीला हिरवा कंदील दिला आहे. राज्यभरात तब्बल १८ हजार ६३१ पोलिस शिपायांची भरती करण्यात येणार असून यासाठी अधिकृत शासन निर्णय (जीआर) काढण्यात आला आहे. विशेष म्हणजे, २०२२ व २०२३ मध्ये वयोमर्यादा पूर्ण केलेल्या उमेदवारांनाही अर्ज करण्याची विशेष परवानगी देण्यात आली आहे. त्यामुळे हजारो उमेदवारांना दिलासा मिळणार आहे.
वयोमर्यादा ओलांडलेल्या उमेदवारांना मोठी संधी
गेल्या काही वर्षांपासून पोलिस भरतीची प्रक्रिया रखडली होती. त्यामुळे वयोमर्यादा पूर्ण झाल्याने अनेक उमेदवारांना संधी गमवावी लागणार होती. मात्र, सरकारने यंदा एकदाच अपवादात्मक निर्णय घेत कमाल वयोमर्यादा ओलांडलेल्या उमेदवारांनाही अर्ज करण्याची संधी उपलब्ध करून दिली आहे. या निर्णयाचे उमेदवारांकडून स्वागत होत असून, “सरकारच्या या निर्णयामुळे आमच्यासारख्या उमेदवारांना पुन्हा एकदा संधी मिळाली आहे,” अशी प्रतिक्रिया भरतीसाठी आतुर असलेल्या उमेदवारांनी व्यक्त केली.
जिल्हास्तरावरून होणार भरती
ही भरती जिल्हास्तरावरून करण्यात येणार असून प्रत्येक जिल्ह्यातील उपलब्ध जागांचा तपशील व वेळापत्रक लवकरच पोलिस भरती बोर्डाकडून जाहीर करण्यात येईल. स्थानिक उमेदवारांना संधी अधिक प्रमाणात मिळण्याची शक्यता असल्याने राज्यातील ग्रामीण व शहरी भागात उमेदवारांमध्ये उत्साहाचे वातावरण आहे.
तरुणाईत जल्लोष, बेरोजगारीवर दिलासा
गेल्या दोन-तीन वर्षांपासून बेरोजगार तरुण संघटनांकडून पोलिस भरतीसाठी सरकारकडे मागणी होत होती. या मुद्यावर आंदोलने देखील झाली होती. अखेर सरकारने निर्णय घेतल्याने बेरोजगार तरुणाईमध्ये जल्लोषाचे वातावरण आहे. या भरतीमुळे हजारो तरुणांना रोजगाराची संधी मिळून बेरोजगारीचा प्रश्न काही प्रमाणात सुटण्यास मदत होणार आहे.
पुढील टप्पा
भरतीसंदर्भातील सविस्तर वेळापत्रक, अर्ज सादर करण्याच्या तारखा, शारीरिक चाचणीचे निकष, लेखी परीक्षेचे स्वरूप याबाबतचा तपशील पोलिस भरती बोर्डाकडून जाहीर होणार आहे. त्यामुळे इच्छुक उमेदवारांनी अधिकृत वेबसाइटवर लक्ष ठेवण्याचे आवाहन प्रशासनाने केले आहे.
