माणदेश एक्सप्रेस न्यूज, कोल्हापूर :-
गेल्या काही महिन्यांपासून चर्चेत असलेल्या ‘महादेवी’ हत्तीणीच्या परतीचा मुद्दा पुन्हा एकदा गाजू लागलाय. कोल्हापूर जिल्ह्यातील शिरोळ तालुक्यातील नांदणी मठातील हत्तीण महादेवी हिला वनतारा (गुजरात) येथे हलवण्यात आल्यानंतर गावकऱ्यांमध्ये तीव्र नाराजी पसरली होती. आता या हत्तीणीला पुन्हा नांदणीत परत आणण्यासाठी काँग्रेस नेते सतेज पाटील आणि माजी खासदार राजू शेट्टी यांच्या नेतृत्वाखाली मोठी स्वाक्षरी मोहीम राबवली जात आहे. अवघ्या २४ तासांत तब्बल 1 लाख 25 हजार 353 लोकांनी यावर स्वाक्षरी केली आहे.
ग्रामस्थांचा भावनिक उद्रेक
महादेवी हत्तीण गेली ३३ वर्षे नांदणी मठात होती. तिला केवळ एक प्राणी म्हणून नव्हे, तर एक ‘धार्मिक प्रतीक’ आणि ‘मठाचा अविभाज्य भाग’ मानलं जातं. त्यामुळे तिला पाठवताना गावकरी, महिला आणि लहान मुलांनी भावनिक निरोप दिला होता. मिरवणूक काढून श्रद्धेने निरोप देताना अनेकांचे डोळे पाणावले होते.
वनतारा टीम नांदणीत भेटीस
महत्त्वाची बाब म्हणजे वनतारा प्रकल्पाचे सीईओ विहान करणी आणि त्यांच्या टीमने नांदणी मठाला भेट देण्यासाठी कोल्हापूरमध्ये आगमन केले आहे. त्यांनी मठाचे स्वामीजींशी चर्चा करण्याचे निश्चित केले आहे. त्यामुळे महादेवीच्या पुनरागमनाची शक्यता गडद झाली आहे.
न्यायालयीन संघर्ष
महादेवीच्या मिरवणुकीसाठी तिचा वापर केल्याचा आरोप ‘पेटा’ संस्थेने केल्यामुळे वन विभागाने हस्तक्षेप केला. न्यायालयाच्या आदेशानंतर समितीच्या अहवालाच्या आधारे मुंबई उच्च न्यायालयाने हत्तीणीला वनताराला हलवण्याचा निर्णय दिला. नांदणी मठ आणि ग्रामस्थांनी सर्वोच्च न्यायालयात याचिका दाखल केली होती, परंतु ती फेटाळण्यात आली.
धार्मिक भावना आणि सामाजिक चळवळ
नांदणी मठ हा जैन धर्मीयांचा श्रद्धास्थान असून महादेवी हत्तीण या मठाशी जोडली गेली होती. त्यामुळे न्यायालयाच्या आदेशामुळे केवळ एक प्राणी नाही तर संपूर्ण गावाच्या धार्मिक भावनांवर घाला आला, असे गावकऱ्यांचे म्हणणे आहे. याच भावनेतून स्वाक्षरी मोहिमेला प्रचंड प्रतिसाद मिळत आहे.
पुढील टप्पा
स्वाक्षरी मोहिमेचे पूजन शनिवारी सकाळी 10 वाजता नांदणी मठात स्वामीजींच्या हस्ते होणार आहे. याआधी 1 ऑगस्ट (शुक्रवार) रात्री 8 वाजेपर्यंत ही मोहीम सुरू राहणार आहे.
महादेवी हत्तीण परत येणार का?
या आंदोलनाला सरकार आणि वन विभाग काय उत्तर देतात, हे पाहणे महत्त्वाचे ठरणार आहे. परंतु इतक्या मोठ्या लोकसहभागामुळे हा प्रश्न केवळ प्राणीहक्काचा नव्हे, तर धार्मिक श्रद्धा, स्थानिक भावना आणि ग्रामीण एकतेचा आवाज ठरू लागला आहे.
