माणदेश एक्स्प्रेस न्यूज
प्रसिद्ध विनोदी कलाकार कपिल शर्मा याच्या नव्याने सुरु केलेल्या कॅफेवर थरारक गोळीबार झाल्याची धक्कादायक घटना समोर आली आहे. कॅनडामधील “Kap’s” कॅफेवर तब्बल 10 ते 12 गोळ्यांचा मारा करण्यात आला असून, या हल्ल्याची जबाबदारी खलिस्तानी दहशतवादी संघटना बब्बर खालसा इंटरनॅशनल ने घेतली आहे. विशेष म्हणजे या हल्ल्यामागे असलेला हरजीत सिंग उर्फ “लाड्डी” हा पाकिस्तानशी संबंधित दहशतवादी असल्याचे निष्पन्न झाले आहे.
कपिल शर्माचा ‘Kap’s Café’ दहशतवाद्यांच्या निशाण्यावर
कपिल शर्माने काही दिवसांपूर्वी कॅनडामध्ये “Kap’s” नावाचा कॅफे सुरू केला होता. पत्नी गिन्नीसह त्याने या कॅफेचे उद्घाटन केले होते आणि सोशल मीडियावर त्याचे फोटो व व्हिडीओ व्हायरल झाले होते. मात्र या कॅफेवर अज्ञात हल्लेखोरांनी धाडसी गोळीबार करत भीतीचं वातावरण निर्माण केलं. सुदैवाने या घटनेत कोणतीही जीवितहानी झाली नसली, तरीही भारतीय कलाकारांवरील वाढती दहशतवाद्यांची टार्गेटिंग ही चिंतेची बाब ठरत आहे.
दहशतवादी हरजीत सिंग उर्फ लाड्डी कोण आहे?
हरजीत सिंग लाड्डी हा बब्बर खालसा इंटरनॅशनलचा सक्रिय सदस्य असून, तो NIA (राष्ट्रीय तपास यंत्रणा) च्या मोस्ट वॉन्टेड यादीत आहे. एप्रिल 2024 मध्ये पंजाबमध्ये झालेल्या विहिंप नेते विकास प्रभाकर यांच्या हत्येमुळे त्याच्यावर 10 लाख रुपयांचं बक्षीस जाहीर करण्यात आलं होतं. तो सध्या जर्मनीत वास्तव्यास असून, तिथूनच तो कॅनडामधील दहशतवादी कारवाया घडवतो, अशी माहिती समोर आली आहे.
ISI कनेक्शन – पाकिस्तानच्या भूमीवरून कटकारस्थानं
हरजीत सिंगचा थेट संबंध पाकिस्तानी गुप्तचर संस्था ISI सोबत असल्याची माहितीही उघड झाली आहे. तो पाकिस्तानातील बब्बर खालसा संघटनेच्या मुख्यांशी संपर्कात असून, जागतिक पातळीवर दहशतवादी कारवाया आणि निधी संकलनाची जबाबदारी याच्यावर आहे. भारताव्यतिरिक्त अमेरिका, कॅनडा, युके आणि युरोपियन युनियनने या संघटनेला आंतरराष्ट्रीय दहशतवादी संघटना म्हणून घोषित केले आहे.
भारताविरुद्ध विदेशी भूमीवरून सुरू असलेल्या कटकारस्थानांची जबरदस्त झलक…
या हल्ल्यामुळे एक गोष्ट पुन्हा स्पष्ट झाली आहे – भारतीय कलाकार, संस्था आणि प्रतिष्ठान आता विदेशी भूमीवरसुद्धा सुरक्षित नाहीत. पाकिस्तानात बसलेली दहशतवादी यंत्रणा, त्यांचे नेटवर्क्स, आणि खलिस्तानी गट यांची वाढती सक्रियता ही राष्ट्रीय सुरक्षेसाठी गंभीर इशारा आहे.
कपिल शर्माने अद्याप यावर कोणताही अधिकृत प्रतिक्रिया दिलेली नाही.
पोलिस आणि कॅनडातील सुरक्षा यंत्रणा या प्रकरणाचा सखोल तपास करत आहेत. कपिलचा कॅफे का निशाण्यावर आला? यामागचं नेमकं कारण काय आहे? हल्लेखोर कोणत्या उद्देशाने काम करत होते? या सगळ्या प्रश्नांची उत्तरं पुढील तपासात स्पष्ट होतील.
