मुंबई : मंत्रालयात वीज बिल व थकबाकी यासंदर्भात बैठक पार पडली. यावेळी राज्याचे ऊर्जामंत्री नितीन राऊत यांनी वीज ग्राहकांना आवाहन केले आहे. कोरोना काळात रीडिंग न घेता बिले पाठवण्याच्या तक्रारी ग्राहकांनी केल्या आहेत. शक्यतो मीटर रीडिंग घेऊनच वीज बिले पाठवावीत. कोरोनामुळे काही वेळा महावितरणला रीडिंग घेणे शक्य होत नसल्याने ग्राहकांनी जर मोबाईल अॅपद्वारे रीडिंग पाठवले, तर त्यांना रीडिंगनुसार बिल उपलब्ध करून देता येईल. कोरोनाचा विषाणू संसर्गाच्या वाढत्या प्रादुर्भावाच्या पार्श्वभूमीवर वीज ग्राहकांनी स्वतः मीटर रीडिंग पाठवून तसेच वीज बिल भरून महावितरणला सहकार्य करण्याचे आवाहन नितीन राऊत यांनी यावेळी केले.
थकबाकी वसुलीसाठी गेलेल्या कर्मचाऱ्यांना मारहाण करण्याच्या दुर्दैवी घटना घडत असून, त्या खपवून घेतल्या जाणार नाहीत, असा स्पष्ट इशारा देत ग्राहकांना ऑनलाइन व मोबाईल अॅपद्वारे तक्रार करण्याची सोय उपलब्ध करून देण्यात आली आहे. ज्या ग्राहकांना ऑनलाइन पद्धतीने तक्रार करता येणार नाही किंवा मोबाइल अॅपचा वापर करू शकत नाही, त्यांच्यासाठी स्थानिक कार्यालयात ऑफलाइन तक्रारी नोंद करून घेण्याची व्यवस्था करावी, असे निर्देश नितीन राऊत यांनी यावेळी दिले.
Join Free Whatasapp माणदेश एक्स्प्रेस
