मुंबई : महाराष्ट्र नवनिर्माण सेनेचे नेते संदीप देशपांडे यांनी मुंबईत पत्रकार परिषद घेऊन शिवसेनेवर जोरदार हल्लाबोल केला आहे. शिवसेनेनं कोट्यवधी रुपयांचा निधी खंडणीरुपी वसूल करत असल्याचा आरोप देशपांडे यांनी केला आहे आणि त्याचा पुरावा म्हणून शिवसेना शाखेकडून पैसे वसूल करत असल्याच्या पावत्या सुद्धा दाखवल्या आहेत.
‘विरप्पने देशाला जेवढं लुटलं नसेल तितकं मुंबई महापालिकेला सत्ताधाऱ्यांनी लुटले आहे. महानगरपालिकेने हॉकर्स झोन सुरू करायचं ठरवलं, रस्त्यावरच्या फेरीवाल्यांकडून खंडणी वसुल करायचं काम सेना करत आहे, कन्नमवार नगर, विक्रोळी येथील शिवसेनेच्या 118 क्रमांकाच्या शाखेकडून सार्वजनिक रस्त्यावर फेरीवाल्यांकडून होत असलेल्या कचरा स्वच्छ करण्यासाठी निधी गोळा केला जात आहे, तो बेकायदेशीर आहे, असा आरोप संदीप देशपांडे यांनी केला.
शिवसेनेच्या शाखेकडून 10 रुपये वसूल केले जात आहेत. यात नगरसेवकांचा फोटो आहे पण बाळासाहेबांचा फोटोही आहे. शिवसेनेला बाळासाहेबांचा फोटो अशाप्रकारे खंडणी वसूल करण्यासाठी वापरण्याचा कोणताही अधिकार नाही. मुख्यमंत्र्यांना यातला कट पोहोचतोय का? असा सवालही देशपांडे यांनी विचारला.
संबंधितांवर कडक कारवाई झाली पाहिजे. महापालिका अधिकारी किंवा पोलीस याला पाठिंबा देत असतील तर त्याची उच्चस्तरीय चौकशी व्हावी, अशी मागणीही देशपांडे यांनी केली.
Join Free Whatasapp माणदेश एक्स्प्रेस
