सांगली : राज्य निवडणूक आयोगाने राज्यातील 34 जिल्ह्यांमध्ये सार्वत्रिक निवडणूकीचा कार्यक्रम घोषित केला आहे. ग्रामपंचायत सार्वत्रिक निवडणूक 2020-2021 कार्यक्रमांतर्गत सांगली जिल्ह्यात दि. 15 जानेवारी 2021 रोजी मतदान होणार आहे. निवडणूक कार्यक्रमानुसार संबंधित निवडणूक क्षेत्रातील सर्व दुकाने, आस्थापना, निवासी हॉटेल्स, खाद्यगृहे, व्यापार, औद्योगिक उपक्रम किंवा इतर आस्थापना यामधील कामगारांना मतदानाच्या दिवशी मतदानाचा हक्क बजावण्यासाठी भरपगारी सुट्टी जाहीर करावी, असे आदेश राज्य निवडणूक आयोगाने दिले आहेत. या आदेशाचे दुकाने, आस्थापना, निवासी हॉटेल्स, खाद्यगृहे, व्यापार, औद्योगिक उपक्रम धारकांनी काटेकोरपणे पालन करावे, असे आवाहन सहाय्यक कामगार आयुक्त अ. द. गुरव यांनी दिली.
निवडणूक होणाऱ्या ज्या ग्रामपंचायतीच्या लगतच्या क्षेत्रात औद्योगिक वसाहती (MIDC) तसेच महानगरपालिकेसारख्या मोठ्या नागरी वसाहती वसलेल्या आहेत. अशा ठिकाणी नोकरी निमित्ताने कामास येणाऱ्या संबंधित ग्रामपंचायतीमधील मतदारांना मतदानाचा हक्क बजावता यावा यादृष्टीने अशा मतदारांना मतदानाच्या दिवशी भरपगारी सुट्टी / विशेष सवलत द्यावी. शहरी भागात किंवा निवडणूका नसलेल्या भागातील दुकाने/कंपन्या/वाणिज्यीक आस्थापना बंद ठेवण्याची आवश्यकता नाही, असे आदेश राज्य निवडणूक आयोगाने दिले आहेत.
या आदेशाचे पालन न केल्यास संबंधित आस्थापनांविरूध्द आवश्यक ती कार्यवाही करण्यात येईल, असे श्री. गुरव यांनी स्पष्ट केले आहे.
Join Free Whatasapp माणदेश एक्सप्रेस
