मुंबई : भारताचा माजी क्रिकेटपटू सचिन तेंडुलकरला कोरोनाचा संसर्ग झाल्याची माहिती त्याने २७ मार्च रोजी दिली होती. मात्र आता कोरोनावरील उपचारांसाठी सचिनला रुग्णालयात दाखल करण्यात आलं आहे. काही दिवसांपासून सचिन घरीच होम क्वारंटाइन होता. मात्र आता डॉक्टरांच्या सल्लानुसार सचिन रुग्णालयामध्ये दाखल झाला आहे. यासंदर्भातील माहिती त्यानेच ट्विटरवरुन दिली आहे.
“माझ्या तब्बेतेसाठी प्रार्थना करणाऱ्या आणि शुभेच्छा देणाऱ्यांचे आभार. दक्षता म्हणून मी वैद्यकीय सल्ल्यानुसार रुग्णालयामध्ये दाखल झालो आहे. पुढील काही दिवसांमध्येच मी पुन्हा घरी येईन अशी अपेक्षा आहे. सर्वांनी काळजी घ्या आणि सुरक्षित राहा,” असं सचिनने ट्विट करुन सांगितलं आहे. तसेच आज २ एप्रिल असल्याने त्याने २०११ साली विश्वचषक जिंकल्याच्या आठवणींना उजाळा देणारं एक वाक्यही या ट्विटमध्ये लिहिलं आहे. “सर्व भारतीय आणि संघ सहकाऱ्यांचं विश्वचषक विजयाला १० वर्षे पूर्ण झाल्याबद्दल अभिनंदन,” असं सचिनने म्हटलं आहे. यामध्ये त्याने भारतीय झेंड्याचा इमोन्जीही वापरला आहे.
Join Free Whatasapp माणदेश एक्स्प्रेस
