बस स्थानकासाठी “ या” नेत्याचे सलग ११ दिवस उपोषण ; उपोषणानंतर एस.टी. महामंडळाकडून बांधकाम सुरु

माणदेश एक्सप्रेस न्युज : म्हसवड/अहमद मुल्ला : म्हसवड एस.टी बसस्टँडचे अनेक वर्षे रखडलेले अर्धवट बांधकाम पूर्ण करावे यासाठी येथील सामाजिक कार्यकर्ते, रिपब्लीकन सेनेचे माण तालुका अध्यक्ष अजिनाथ लक्ष्मण केवटे यांनी म्हसवड एस.टी. स्टॅंड जवळ १४ ऑगस्ट पासून आंदोलन सुरु केले होते.

या आंदोलनस्थळी अनेक मान्यवरांनी भेटी देउन आपला पाठींबा दिला होता. एस.टी.महामंडळाने अनेकवेळा आंदोलन स्थळी भेटून लवकरच काम सुरु करत असल्याचे आश्वासन दिले होते. मात्र प्रत्यक्षात काम जोपर्यंत सुरु होत नाही तोपर्यंत कसल्याही परिस्थितीत उपोषण माघार घेणार नाही अशी ठाम भूमिका घेउन केवटे यांनी आपले उपोषण सुरुच ठेवले.

त्यांनी केलेल्या ११ दिवसाच्या उपोषणा दरम्यान त्यांना सर्वच राजकीय पक्ष संघटना व कार्यकर्त्यांचा पाठींबा वाढत गेला आणि बुधवार दि. २३ रोजी शहरातील सर्व संघटना व सर्व पक्षातील पदाधिकारी व नागरीकांनी रास्तारोको केल्यामुळे आज दिनांक २४ रोजी महाराष्ट्र परिवहन मंडळ यांनी ताबडतोब दखल घेऊन बसस्थानकाचे काम प्रत्यक्षात सुरु केले.

बस स्थानकाचे अर्धवट प्रलंबित बांधकाम तात्काळ सुरू केल्यामुळे व आठ महिन्यात काम पूर्ण करणार असल्याचे लेखी आश्वासन दिल्यामुळे अजिनाथ केवटे यांनी ११ दिवस चालु असलेले आपले उपोषण मागे घेतल्याचे जाहीर केले. ठेकेदार मे. एस.स्वेअर इन्फ्रा.पुणे कॉन्ट्रॅक्टर यांच्या विनंती वरून कामाचा शुभारंभ अजिनाथ केवटे यांचे हस्ते श्रीफळ वाढवून करण्यात आला. बस स्थानकाचे काम चालू झाल्यामुळे म्हसवडकर नागरीकांनी फटाके वाजवून आनंद व्यक्त केला.