आटपाडी आगाराची ‘त्या’ चालकावर कारवाई : बस चालवत असताना मोबाईलवर बोलत असल्याचा व्हिडीओ समोर आल्यावर केले निलंबित

माणदेश एक्सप्रेस न्युज I १४ मार्च २०२३ I आटपाडी : आटपाडी आगाराच्या चालकाला रजा नाकारण्यात आल्याने आजारी पत्नीने दिनांक १२ रोजी आटपाडी आगार प्रमुख याच्या केबिन समोर झोपून निषेध व्यक्त करत आंदोलन केले होते. सदर महिलेवर आटपाडी पोलिसात अदखलपात्र गुन्हा नोंद झाला होता. परंतु आता मात्र त्याच चालकाचा बस चालवत असताना मोबाईल वर बोलत असल्याचा व्हिडीओ व्हायरल झाल्यांनतर त्याला निलंबित करण्यात आले आहे.

आटपाडी आगारा मध्ये विलास कदम हे चालक म्हणून कार्यरत आहेत. त्यांनी दिनांक 6 मार्च रोजी पत्नी आजारी असल्याने बारामती येथील दवाखान्यात जाण्यासाठी दिनांक 12 व 13 अशी दोन दिवस रजा मागितली होती. पत्नी आजारी असल्याने चालक विलास कदम यांना आगार प्रसाशनाने रजा देवून त्यावर मार्ग काढणे आवश्यक असताना त्यांना रजा नाकारण्यात आली. त्यामुळे त्यांची आजारी पत्नी नंदिनी कदम यांनी आगार प्रमुखांच्या केबिन समोर झोपून निषेध आंदोलन केले होते.

सदरचे प्रकरण आगार प्रशासनाने गंभीरतेने घेतले होते. याबाबत सहाय्यक कार्यशाळा अधिक्षक स्वप्निल वसंतराव हसबे यांनी चालक विलास कदम यांच्या पत्नीवर अदखलपात्र गुन्हा नोंद केला होता. तर आज सदर चालकाचा बस चालवत असताना मोबाईल वर बोलत असतानाचा व्हिडीओ व्हायरल झाल्यानंतर त्यास विभागीय वाहूक अधिकारी, सांगली यांनी चालक विलास कदम यांना चौकशीसाठी निलंबित करण्यात आले आहे.

पहा व्हिडीओ